Saýalnama: Qazaqstandyqtardyń 82%-y Prezıdentke senim bildiredi
ASTANA. KAZINFORM – Qazaqstandyqtardyń basym bóligi Memleket basshysy Qasym-Jomart Toqaevtyń saıası baǵytyn qoldaıdy. Bul týraly QR Prezıdenti janyndaǵy Qazaqstannyń strategııalyq zertteýler ınstıtýty júrgizgen áleýmettik saýalnama qorytyndysynda aıtyldy.
Zertteý 11 shilde men 12 tamyz aralyǵynda 17 oblys pen Astana, Almaty, Shymkent qalalarynda ótti.
Saýalnamaǵa 18 jastan asqan 8 myń adam qatysty.
Nátıjelerge sáıkes, respondentterdiń 82,4%-y Prezıdentke senim bildirip otyr. Eń joǵary kórsetkish 18–29 jas aralyǵyndaǵylarǵa tıesili – 90,3%. Odan keıingi orynda 30–45 jastaǵylar (82,4%), 46–60 jas toby (78,6%) jáne 61 jastan asqandar (77,8%).
Saýalnama aýyl turǵyndarynyń qoldaýy qala halqyna qaraǵanda sál joǵary ekenin kórsetti – tıisinshe 84,9% jáne 80,9%.
Mamandyqtarǵa bólgende, eń joǵary deńgeıde qoldaý bildirgender – quqyq qorǵaý organdarynyń qyzmetkerleri (96,9%). Sondaı-aq bilim berý salasy ókilderi (89,6%), memlekettik qyzmetshiler (87,1%), aýyl sharýashylyǵy qyzmetkerleri (86,2%), densaýlyq saqtaý mamandary (84,5%), mádenıet pen óner salasynyń ókilderi (85,9%) Prezıdent saıasatyna qoldaý kórsetip otyr.
Instıtýt málimetinshe, zertteý qorytyndysy el arasynda Memleket basshysyna degen senimniń turaqty joǵary deńgeıde saqtalyp otyrǵanyn dáleldedi. Bul júrgizilip jatqan memlekettik saıasattyń azamattar úshin tıimdi ekenin kórsetedi.
Aıta keteıik, qazaqstandyqtardyń 73%-y elimiz durys baǵytta damyp jatyr dep sanaıdy.