Saýalnama: Erteń «Astana» chempıon atanady

Saýalnamany «VKontakte»áleýmettik jelisindegi «Qazaq fýtboly» toby júrgizip jatyr, onda úsh saǵat ishinde eki myńnan astam adam óz pikirin bildirgen. Fýtbol jankúıerleriniń bar nazary qazir el birinshiligine aýyp otyr. 2017 jylǵy Qazaqstan Premer-lıgasynyń sheshýshi kezeńine de kelip jettik. Erteń,  28 qazan kúni, 15:00-de elimizdiń alty birdeı qalasynda 32-týr oıyndaryna start beriledi.

Shúbásiz, týrdyń basty kezdesýi - «Astana Arenada» ótetin «Astana» - «Qaırat» matchy. 31 týrdan keıin 76 upaımen birinshi orynda kele jatqan elordalyq ujym osy týrda barlyq máseleni óz paıdasyna sheship, ÝEFA Eýropa lıgasynyń kelesi kezdesýine qatysý maqsatynda Tel-Avıvke alańsyz ketý úshin baryn salady. Óıtkeni eýrododanyń toptyq kezeńiniń 4-týry aıasynda «Makkabıge» qarsy oıynda «Astana» bıylǵy eýrokýboktarda óz aldyna qoıǵan basty eki mindetiniń birin oryndaýy múmkin, ıaǵnı toptyń 3-orynyn óz esebine jazyp qoıýyna bolady. Ári Izraılde jeńiske jetip jatsa, qazaq fýtboly tarıhynda tuńǵysh ret eýrokýboktardyń kóktemgi pleı-offtyq kezeńine ótý úshin qolaıly jaǵdaıǵa ıe bolady. Bul - «Astananyń»«maksımým» mindeti. Oǵan el bolyp úmit artamyz.

Chempıonattyń alǵashqy kezeńinde aıtarlyqtaı upaılardan aıyrylǵan Almatynyń «Qaıraty» «Astanadan» 4 upaı artta keledi. Degenmen, almatylyqtar chempıondyqtan áli de bolsa úmitin úzgen joq. Oǵan negiz bar da. Týra bir apta demalyp, kúshine tolǵan «Qaırat» erteń búkil terin tógedi. Al sońǵy týrda «Aqtóbeni» araǵa taǵy bir juma salyp, 5 qarashada óz alańynda qabyldaıdy. Elimizdegi akademııasy eń myqty klýb oıynshylarynyń dene múmkindikteri sońǵy oıyndardyń ekeýin de jeńýge tolyq múmkindik beredi.

Al úsh dúrkin el chempıondarynyń grafıgi óte tyǵyz. 25 qazanda óz alańynda «Oqjetpeske» qarsy Stanımır Stoılov táýekelge barmaı, tolyq qurammen oınady. Óıtkeni qosalqy qurammen Premer-lıgada oınaýǵa bolmaıtynyn «Ordabasy» aldyńǵy týrda durystap túsindirgen bolatyn (2:1 esebimen jeńgen). Úsh kúndik merzim elordalyq ujymnyń ózine kelip alýyna qanshalyqty jetkilikti bolatynyn erteń kóremiz. Onda qandaı nátıje tirkelýinen tys, «Astana» ekinshi maıdanǵa daıyndyǵyn bastap jiberedi - «Makkabıge» qarsy syrt alańdaǵy aýyr oıyn 2 qarasha, 21:00-de (Astana ýaqytymen 00:00-de) bastalady. Sodan týra 64 saǵattan keıin taǵy da «Astana Arenada» chempıonattyń sońǵy týry aıasynda «Aqjaıyqty» qabyldaıdy. «Astana» oıynshylarynyń dene daıyndyǵy naǵyz synnan ótetin sát - osy kez. Erteńgi oıynda teń nátıje tirkese de «Astana» merziminen buryn chempıon atanady. Al eger de «Qaırattan» jeńilip qalyp, Tel-Avıvten álsirep qaıtyp, Premer-lıgada jan saqtap qalý úshin baryn salatyn «Aqjaıyqty» óz alańynda jeńe almasa, úsh jyldyq altyn serııaǵa núkte qoıyldy deı berińiz. «Astana» úshin aldaǵy 8 kún sheshýshi mánge ıe: ne chempıondyq+Eýropa lıgasyndaǵy tarıhı jeńister ne eshteńe.

Óıtkeni, elordalyq ujymdy jeńip qaıtý «Qaırattyń» jigerin janyp, sońǵy týrda olar «Aqtóbege» búkil qaharyn shashatyny aıdan aıqyn.

Úshinshi orynda - «Ordabasy». Osy týrda«Aqtóbege» baryp, 5 qarashada «Oqjetpesti» qabyldaıtyn shymkenttikterdiń upaıy onsyz da túgel. Bul eki oıyn olardyń óz tarıhyndaǵy alǵashqy qola medaline eshqandaı áser etpeıdi, jalpy, bıyl úshinshi orynda - «Ordabasy».

2018-2019 jylǵy ÝEFA Eýropa lıgasynyń irikteý kezeńine joldama alý úshin qııan-keski kúres Qostanaıdyń «Tobyly» men Pavlodardyń «Ertisi» arasynda bolady. Stadıonyn jóndeýden shyǵaryp, eńsesi kóterilgen qostanaılyqtar eýrojoldama beretin tórtinshi orynda 43 upaımen tur, al pavlodarlyq ujym olardy nebári 1 upaı artta ókshelep keledi.

32-týrda Qaraǵandyǵa «Shahtermen» oınaýǵa baryp, sońǵy týrda «Atyraýdy» qabyldaıtyn «Tobyl» bir jaqtan, paralleldi túrde aldymen «Oqjetpesten» úsh upaı alý úshin Kókshetaýǵa baryp, sońǵy týrda «Shahterdi» qabyldaıtyn «Ertis» ekinshi jaqtan kúres júrgizedi. Eki ujym da sońǵy eki oıynda búkil 6 upaıdy jınap alý úshin baryn salady. Demek, olardyń maıdany «Astana» men «Qaırattyń» teketiresinen qyzyqty bolmasa, kem túspesi anyq.

Erteń, bulardan tys, «Atyraý» - «Taraz», «Aqjaıyq» - «Qaısar» oıyndary da tartysty ótedi. Bulardyń ishinde tek qyzylordalyqtar 38 upaımen 7-orynda berik tur, al qalǵandary keler jyly da el birinshiligine talasý úshin ózderin saqtandyrýy tıis - dál qazir «Atyraý» 32 upaımen 8-shi, «Aqjaıyq» 29 upaımen 10-ynshy, al «Taraz» 26 upaımen 11-inshi bolyptur. Ymyrasyz kezdesýler bizdi kútip tur deýge negiz bar. «Qaýipti aımaq» komandalarynyń arasyndaǵy oıyndar chempıonat sońynda qaı jyly bolsa da qyzý ótetini belgili.

Qorytyndy týr týraly erteńgi matchtardan keıin sóz órbitken durys bolar, qazirgi nazar - 32-týrda. Tamashalaımyz.

Eske sala keteıik, sońǵy týrlardyń ekeýinde de komandalar dál bir ýaqytta alańǵa shyǵady: 32-týr oıyndary 28 qazan kúni Astana ýaqytymen 15:00-de, 33-týr oıyndary 5 qarashada 16:00-de (Astana) bastalady.