Saýalnama boıynsha Frantsııanyń jańa premeri prezıdent Ollandtan eki ese bedeldi
ASTANA. QazAqparat - Frantsııanyń jańa premer-mınıstri Manıýel Vals bedeldilik reıtıngisi boıynsha prezıdent Fransýa Ollandty basyp ozdy. LH2 ınstıtýty jarııalaǵan saýalnama boıynsha, frantsýzdardyń 56 paıyzy osydan bir apta buryn ǵana taǵaıyndalǵan úkimet basshysy týraly oń pikirde ekendikterin bildirgen.
Atalǵan kórsetkishti eskere otyryp, mýnıtsıpaldyq saılaýda sotsıalısterdiń jeńilisinen keıin Ollandtyń bastamasymen mınıstrler kabınetinde jasalǵan ózgerister kútilgen nátıjelerge qol jetkizdi dep aıtýǵa bolady. Óıtkeni Valstyń izashary - úkimet basynda 2 jyl otyrǵan Jan-Mark Eırony frantsýzdardyń tek 23 paıyzy ǵana qoldaǵan bolatyn.
Valstyń myqtylyǵy - ishki ister mınıstri bolyp turǵan kezde birshama qatań is-áreketteriniń ózi jaqtastary - sotsıalısterdiń ǵana emes, keıde lıberal-konservatorlardyń da qoldaýyna ıe bolyp otyrǵandyǵynda. Degenmen, sarapshylardyń pikirinshe, bul saıasatkerdiń de tanymaldyǵy jaqyn bolashaqta edáýir quldyraýy múmkin. Alaıda dál qazirgi saýalnama boıynsha Vals Ollandtyń ózinen kósh ilgeri tur. Aıta keteıik, bul saýalnamada Ollandtyń jınaǵan daýysy - 27 paıyz.
