Saýalnama: batys turǵyndary úshinshi dúnıejúzilik soǵystyń bastalýynan qaýiptenedi
ASTANA. QazAqparat - YouGov kompanııasynyń saýalnamasyna qatysqan batys elderdiń turǵyny álem úshinshi dúnıejúzilik soǵys aldynda tur dep sanaıdy, dep habarlaıdy QazAqparat.
The Independent basylymynyń jazýynsha, áleýmettanýshylar Batystyń toǵyz memleketinde 9 myńnan astam adamdy surastyryp shyqqan, onyń ishinde AQSh, Ulybrıtanııa jáne Frantsııa turǵyndary bar.
AQSh-ta respondentterdiń 64 paıyzy úshinshi dúnıejúzilik soǵystan qashyp qutylý múmkin emestigin paıymdaýda.
Ulybrıtanııada jańa jahandyq soǵystyń taıap qalǵanyn saýalnamaǵa qatysqandardyń 61 paıyzy sezinýde, toǵyz myń adamnyń 19 paıyzy beıbit ómir bolaryna úmitti.
«Ásirese, frantsýzdyqtar men amerıkalyqtardyń úreıi basym. Degenmen, olardyń sebepteri ártúrli», - dep atap ótti YouGov-tyń saıası jáne qoǵamdyq zertteýler dırektory Entonı Ýells.
Onyń aıtýynsha, amerıkalyqtardyń qorqynyshy prezıdent Donald Trampqa qatysty ekiushtylyqpen baılanysty bolýy múmkin. Frantsýzdar bolsa, terrorızmnen qaýiptenedi, jaýap alynǵandardyń 81 paıyzy elde jaqyn ýaqytta jańa lańkestik oqıǵalar bolady dep esepteıdi.
Sondaı-aq, «RIA Novostı» agenttiginiń habarlaýynsha, brıtandyqtardyń 71 paıyzy jáne amerıkalyqtardyń 59 paıyzy Reseı tarapynan áskerı qaýipti sezinetindigin aıtyp ótken.
Foto: © Flickr/ Glen Bowman
