Satyp alýlardyń biryńǵaı portalyn qurýǵa qarsylyq bildiretinder de bolady - mınıstr Sultanov

ASTANA. QazAqparat - QR Qarjy mınıstri Baqyt Sultanovtyń aıtýynsha, memlekettik jáne kvazımemlekettik satyp alýlar boıynsha biryńǵaı elektrondy portaldy qurý jumystary bastaldy.

Alaıda ony iske qosý úshin tıisti zańdy qabyldaý qajet, dep xabarlaıdy QazAqparat tilshisi.

"Biz Úkimet basshysynyń birinshi orynbasary Asqar Mamınniń tóraǵalyǵymen birneshe ret kezdestik. Qazirgi kóterilip jatqan áńgime, memlekettik satyp alý, kvazımemlekettik satyp alýlar, taý-ken jáne monopolısterdiń satyp alýlaryn bir prıntsıpterge keltirý kerek. Elbasynyń tapsyrmasy boıynsha biz elektrondy texnologııalardy paıdalanyp, bárin biryńǵaı elektrondy platformaǵa alyp kelýimiz qajet. Qazirgi kezde tıisti jumystardy júrgizip jatyrmyz. Mysaly, "Samuryq-Qazynanyń" quramynda "Samuryq-Kontrakt" degen kompanııa bar. Ol qor aıasyndaǵy barlyq satyp alýlardy qadaǵalap otyrady. Endi, ony bizdiń aqparattyq júıemen biriktirý kerek", - dedi Sultanov QazAqparat tilshisine bergen suxbatynda.

Onyń aıtýynsha, mınıstrlik aǵymdaǵy jyldyń birinshi toqsanynda tıisti zań jobasynyń tujyrymdamasyn engizýi tıis.

"Árıne, osy bastamaǵa qarsylyq bildiretinder de bolady. Biraq biryńǵaı elektrondy portaldy engizýdiń arqasynda ınvestorlar da, kásipkerler de uzaqmerzimdi josparlar jasaı alady", - dep atap kórsetti mınıstr.

Aıta keteıik, 4 aqpan kúni ótken Úkimet otyrysynda Premer-Mınıstr Baqytjan Saǵyntaev "Samuryq-Qazynanyń" satyp alýlarymen jaqsy tanys ekenin jetkizip, barlyǵyna ortaq erejelerdi ázirleýdi tapsyrǵan bolatyn. "Qazirgi júıeni túbegeıli ózgertý kerek. Bir aptanyń ishinde osy sanattaǵy kompanııalardyń satyp alýlaryna qatysty ortaq erejeler ázirlenýi tıis. Osy jumys barysynda kvazımemlekettik sektordyń satyp alýlaryn ashyq ári qoljetimdi etýge basa nazar aýdarý qajet. Ony qysqa ýaqyttyń ishinde jasaýdyń qajettiligi nede? Óıtkeni jaqyn arada satyp alýlar naýqany bastalady. Qazir barlyq qaǵazdar men erejelerdi aqtaryp shyqqansha, bir jyl óte shyǵady. Sosyn taǵy kelesi jylǵa qalamyz. Sondyqtan aǵymdaǵy jyldyń birinshi toqsanynda Qarjy mınıstrligi tıisti zań jobasyn ázirleýi tıis. Ol satyp alýlardy biryńǵaı elektrondy formatqa aýystyrý qajet. Al otandyq kásipkerlerdiń oǵan emin-erkin qatysqany jón",- dep atap kórsetti Úkimet basshysy.

Sondaı-aq Baqytjan Saǵyntaev memleketten jeńildik kóp suraıtyn, alaıda otandyq taýarlardy almaıtyn "Arselor Mıttal" syndy kompanııalardy synǵa aldy.