Satyp alý boıynsha aıyp taǵylǵan «Samuryq-Qazynaǵa» qatysty tergeý aıaqtaldy

ASTANA. QazAqparat – «Samuryq Qazyna» AQ-nyń satyp alý erejesin buzý faktisi boıynsha tergeý amaldary aıaqtalyp, is sotta qaralyp jatyr. Іstiń mán-jaıy týraly Básekelestikti qorǵaý jáne damytý agenttigi tóraǵasynyń orynbasary Bolat Sámbetov aıtyp berdi, dep habarlaıdy QazAqparat tilshisi.

«Samuryq-Qazyna» aktsıonerlik qoǵamyna qatysty tergeý aıaqtaldy. Qor uıymdary satyp alýdy júzege asyrý talaptaryn buzǵan. Ómirdi saqtandyrý boıynsha qyzmetti bir kózden satyp alyp otyrǵan. Al, talap boıynsha satyp alý básekelestik ádisi arqyly júzege asyrylýy tıis. Atalǵan fakti – qordyń ortalyqtandyrylǵan satyp alýdy baqylaý qyzmetiniń ózdiginen áreket etýiniń dáleli. Bul óz kezeginde saqtandyrý qyzmetteri naryǵyndaǵy básekelestiktiń shektelýine alyp keledi», - dedi Bolat Sámbetov ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, qazirgi ýaqytta tekserý nátıjelerine shaǵymdaný boıynsha sot júrip jatyr.

Sondaı-aq, buǵan deıin ıAndeks.Taksı kompanııasynyń qyzmetine qatysty bir aıyptaý isi toqtatylyp, ekinshisi sotta qaralyp jatqany týraly habarlaǵan edik.