Satylymǵa shyqqan shólmeginiń qaǵazynda Alla aty jazylǵan araqqa qatysty QMDB málimdeme jasady
ASTANA. 5 sáýir. QazAqparat - Osyǵan deıin Ábý Násir ál-Farabı babamyzdyń, Túrkistan qalasynyń, ulttyq aspabymyz - dombyranyń sýretteri shaıtan sýdyń shólmegine qoıylǵany qoǵamda kelispeýshilik týdyrǵan edi.
Endi mine, adamdy aqyldan adastyratyn araqqa Allanyń aty jazylyp, satylymǵa shyqqanynan habardar boldyq. Bul el musylmandarynyń narazylyǵyn týdyryp otyr. Atalmysh araq bótelkesiniń qaǵazynda: «Tek Alladan basqa jeńýshi joq» dep jazylǵan. Sharıǵat boıynsha, araq ishýdiń úkimi - anyq haram. Paıǵambarymyzdyń (s.ǵ.s.) araqty jasaýshyǵa ony jasatýshyǵa ishkenge, ishkizgenge, tasýshyǵa jáne tasytqanǵa, satýshyǵa, satyp alýshyǵa, syıǵa tartýshyǵa, araqty satyp, aqshasyn paıdalanǵanǵa laǵynet aıtqany belgili»,-delingen málimdemede.
«Aqtóbe qalasyndaǵy araq shyǵarýshy «Geom» seriktestiginiń basshylarynyń mundaı soraqy qatelikke qalaısha jol bergendigi bizge beımálim. Qazaqstan musylmandary dinı basqarmasynyń Aqtóbe oblystyq ókildigine zaýyt basshylary Alla atyn ádeıi jazbaǵandyqtaryn, arabsha sózdiń maǵynasyna mán bermegendikterin aıtyp aqtalýda. Olar bul qatelikteri úshin el aldynda keshirim suraıtynyn málimdedi. Mundaı aýyr qatelikke qandaı sebeppen jol berilse de biz ony aýyr aıyptaımyz. Aldaǵy ýaqytta osyndaı ospadarlyqqa jol berilmeýi tıis. Sondyqtan atalǵan mekeme basshylarynan jibergen qatelikteri úshin Qazaqstan musylmandary aldynda keshirim surap, Allanyń aty jazylǵan araqtyń satylymnan túgeldeı alyp tastaýyn talap etemiz»,-deıdi QMDB.
