Satylatyn kómirdiń sapasyn qadaǵalaý mindeti kimderge júktelen

ASTANA. QazAqparat - El turǵyndaryna satylatyn kómirdiń sapasyn jergilikti bılik qadaǵalýy tıis. Bul týraly Ortalyq kommýnıkatsııalar qyzmetinde QR Energetıka vıtse-mınıstri Baqytjan Jaqsalıev málim etti, dep habarlaıdy QazAqparat.

«Kómirdiń sapasyna qatysty shaǵymdar shynymen de boldy. Turǵyndardan bólek, úsh kún buryn energetıkalyq kásiporyndar tarapynan da boldy. Bul másele «Qarajyra» ken ornynan jetkizilgen kómirge qatysty aıtylǵan edi. Qazirgi kezde bul shaǵymdarǵa qatysty máseleni qarastyryp jatyrmyz. Atap óter jaıt, bul negizinen taý-ken óndirý jumystarynda bolǵan kemshilikterge baılanysty. Búginde shuǵyl túrde osy kómir óndiretin kásiporyndardyń ókilderin shaqyrtyp jatyrmyz», - dedi vıtse-mınıstr.

Sonymen qatar ol ákimdikterdi el turǵyndaryna satylatyn kómirdiń sapasyna nazar aýdarýǵa shaqyrdy.

«Shynymen de elimizdegi tutynýshylarǵa tómen sapaly kómirdi satatyn jaǵdaılar kezdesedi. Keı kezde kómir satatyndar múldem basqa baǵany qoıyp jatady. Máselen, «Shubarkóldiń» ornyna basqa sapadaǵa kómirdi ótkizedi. Bul negizinen durys qadaǵalanbaıtyn naryq segmentterinde bolady», - dedi B. Jaqsalıev.

Onyń aıtýynsha, osyndaı shaǵyn alańdarda kómir sapasyn qadaǵalaý qıyndaý. Sonymen qatar Energetıka mınıstrligi naryqtyń osy segmentin baqylaı almaıdy. Bul saladaǵy problemalarmen birinshi kezekte jergilikti atqarýshy organdardyń tıisti qyzmetteri aınalysýy kerek.