Satybaldy Narymbetovtyń «Kózimniń qarasy» atty kitabynyń tusaýkeseri ótti

Qoǵam jáne óner qaıratkerleri qatysqan keshti «Kózimniń qarasy» mádenı-tanymdyq klýby jáne Sh.Aımanov atyndaǵy «Qazaqfılm» kınostýdııasy uıymdastyrǵan.

Kınostýdııanyń baspasóz qyzmetiniń habarlaýynsha, sýretker tek kıno salasynda ǵana emes, sonymen qatar, kórkem proza janrynda da ónimdi eńbek etip keledi. 1968 jyly «Tentek» atty kitaby, 1981 jyly «Assalaýmaǵaleıkým, Atlantıda!» atty povest, áńgimeler jınaǵy jaryq kórgen. Al «Kózimniń qarasy» kitaby S.Narymbetovtyń avtorlyq álemin tereńirek asha túsetin týyndy. Onda kınorejısserlik, jazýshylyq qasıet boıynan úılesim tapqan tulǵanyń ómir soqpaǵy, óneriniń syry, azamattyq bolmysy, áriptesteri týraly, qoǵam men rýhanııat jaıly tolǵamdary, esseleri men estelikteri, sondaı-aq áriptesteriniń avtor týraly oılary da qamtylǵan.

Budan bólek, kitapqa rejısserdiń kınostsenarııleri de engizilip otyr. Qazaq kınosynyń álemdik kontekstegi ornyn anyqtaýǵa múmkindik beretin, úsh bólimnen turatyn jınaq ulttyq mádenıetimizdi taǵy bir qyrynan aıshyqtaıdy.

Aıta keteıik, Satybaldy Narymbetov - belgili kınorejısser, kınostsenarııshi, jazýshy, QR eńbek sińirgen qaıratkeri, QR Memlekettik syılyǵynyń ıegeri, táýelsiz «Tarlan» jáne Frantsýz kınoóner Akademııasy Jorj jáne Rıta Sadýl atyndaǵy júldeniń ıegeri, birneshe bedeldi Halyqaralyq kınofestıvalderdiń júldegeri.

Ol 1946 jyly 7 naýryzda Ońtústik Qazaqstan oblysynda dúnıege kelgen. 1965 jyly QazMÝ-diń fılologııa fakýltetin bitirgen. 1969 jyly Búkilodaqtyq kınematografııa ınstıtýtyn, 1984 jyly Máskeýdegi joǵary kınorejısserlik kýrsyn támamdaǵan.

Óz stsenarııleriniń negizinde birneshe súbeli derekti jáne kórkemsýretti fılmder túsirdi. Aıtalyq, «Sozaqtan shyqqan Gamlet» (1990 j.), «Kózimniń qarasy» (1995 j.), «Ompa» (1998 j.), «Mustafa Shoqaı» (2008j.), «Amanat» (2015j.) t.b.