Satybaldy Narymbetov: Prezıdent kókeıde júrgen dúnıelerdi dóp basyp aıtty

NUR-SULTAN. QazAqparat –Prezıdent Qasym-Jomart Toqaevtyń «Egemen Qazaqstan» gazetinde jarııalanǵan «Táýelsizdik bárinen qymbat» atty maqalasynda kókeıde júrgen dúnıeler dóp basyp aıtylǵan. Mundaı pikirdibelgili kınorejısser, kınostsenarııshi, jazýshy, QR eńbek sińirgen qaıratkeri Satybaldy Narymbetov bildirdi, dep habarlaıdy QazAqparat tilshisi.

«Maqaladaǵy tushymdy oılardy el basqaryp otyrǵan azamattyń aıtýy – bizge úlken demeý. Bul máselelerdi qoǵam belsendileri de kóterip júr. Degenmen Prezıdent Qasym-Jomart Toqaev mańyzdy taqyryptarǵa toqtalyp, kókeıde júrgen dúnıelerdi dóp basyp aıtty. Ásirese, ózim talaı jyldar eńbek etken kıno salasyna qatysty óte jaqsy bastama kóterildi. Biz tarıhı týyndylardy qolǵa alsaq, kópshiligi «Nege únemi tarıhı kınolar túsire beremiz?» dep narazylyq tanytady. Kerisinshe Gollıvýd sııaqty boevık fılmderdi kóptep túsirýimizdi suraıdy.

Biz osydan 30 jyl buryn Táýelsizdik alyp, el bolyp, irgetasymyz qalandy. Bul asa kóp ýaqyt emes. Qazir qoǵamda ózin-ózi taný úrdisi júrip jatyr. ıAǵnı, bul – tarıhı derekter negizinde ózimizdi tanyp, osynyń arqasynda jastardy tárbıeleý protsesi.

Meniń stýdent kezimde «Qazaqstan tarıhy» degen shaǵyn qońyr kitap bolatyn. Oǵan tek 1917 jyldan bergi qazaq halqynyń bastan ótkergen saıası-áleýmettik oqıǵalary toptastyrylǵan. Al bizdiń ulttyń tarıhy tereńnen bastaý alady. Degenmen onyń birazy umytyldy. Sondyqtan ult tárbıesi jolynda mańyzdy ról atqaratyn kıno óneri arqyly osy burmalanǵan tarıhty qaıta qalpyna keltirýimiz qajet. Osynyń negizinde jastarǵa durys baǵyt kórsete alamyz», - dedi Satybaldy Narymbetov.

Kınorejısserdiń pikirinshe, jyl saıyn keminde bir tarıhı fılm túsirilýi qajet. Osy maqsatta «Ulttyq kınony qoldaý memlekettik ortalyǵynyń» sarapshylar keńesi taıaýda bas qosyp, tarıhı kınolarǵa basymdyq berý máselesin talqylaýdy josparlap otyr.

«Tarıhı fılmderge kóbirek qarajat bólýge tyrysýymyz kerek. Máselen, L.N.Gýmılev sııaqty ataqty tarıhshylar qazaq dalasyna saıahat jasap, ultymyzdyń tarıhyn dáıekti derekter keltire otyryp jazyp ketti. Ony Gýmılev qazaqtarǵa jaǵyný úshin emes, jastar osynyń negizinde shynaıy tarıhty oqysyn degen nıette jasaǵan. Al biz qazirgi tańda bar dúnıeni kórsete almaı otyrmyz. Sondyqtan Prezıdenttiń bul baǵytqa basa nazar aýdarýy oryndy jáne kıno salasyna serpilis bermek», - dep atap ótti QR eńbek sińirgen qaıratkeri.

Sondaı-aq Satybaldy Narymbetov sońǵy ýaqyttarda qazaq halqynyń tarıhy týraly fılm túsirýge nıet bildirgen sheteldik kınokompanııalardyń qatary artqanyn atap ótti. Alaıda sheteldik kıno salasynyń mamandary túsirilim úshin qomaqty qarjy talap etedi.