Satýshydan túbirtek talap etýdiń máni tereńde – Serik Jumanǵarın

ASTANA. KAZINFORM – Siz taýar satyp alǵanda túbirtek talap etesiz be? Nelikten túbirtek talap etý kerek? Kazinform agenttiginiń BIZDIÑ ORTA podkastynda osy suraqtarǵa taǵy bir toqtaldyq. 

– Túbirtek talap etýdiń negizinde salyq tóletý jatqan joq. Onyń máni tereń. Biz erteń qandaı memleket bolamyz? Bolashaq qalaı bolady? Azamattyq qoǵam belsendi bola ma? Mysaly, meıramhanaǵa barǵanda tólem jasaýǵa birneshe POS termınal usynady, bireýimen taǵamdy tóleısiń, ekinshisimen sýsyndy tóleısiń, taǵy sol sııaqty. Bul degenimiz – iri bıznesti usaqtaý. Qonaqúıge barasyń, árbir qabat – bólek kompanııa, biraq qojaıyny bir adam. Bul – durys emes, biraq buǵan zańmen tyıym salynbaǵan, sondyqtan sondaı áreketterdiń bolýy múmkin, - dep jasap berdi Premer-Mınıstrdiń orynbasary – Ulttyq ekonomıka mınıstri Serik Jumanǵarın. 

Osy oraıda Ulttyq ekonomıka mınıstri elimizde bızneske jaǵdaı jasalǵanyn aıtyp ótti. 

– Qoldan kelgenshe jaǵdaı jasalyp jatyr, ınfraqurylymdy, joldy salamyz. Bıznes klımatty jaqsartyp, syrtqy naryqqa shyǵýǵa jaǵdaı jasaımyz. Sonymen qatar bıznes nesıeniń mólsherlemesin tómendetemiz, sýbsıdııa, garantııa beremiz. Bıznestiń barlyq túrine teńdeı jaǵdaı jasalǵan. Bizdiń bir ǵana suraıtynymyz – paıdany jasyrmaı, salyq tóle. Bilemiz, kezinde qate jiberdik, qazir ony ózgertip jatyrmyz. Kóbine unamaıdy, basqa memleketterge kóship ketemiz dep jatady, kóship kórsin, aıyrmashylyǵyn birden túsinedi, - deıdi ol.

Aıta keteıik, 9 sáýirde Májilis Salyq kodeksiniń jańa jobasyn birinshi oqylymda maquldady.

Salyq kodeksiniń jańa jobasy boıynsha salyq esebin tapsyratyndar sany 30 paıyzǵa qysqarady.

Eske salsaq, qosylǵan qun salyǵy salynatyn aınalymnyń tómengi shegi 40 mln teńge bolady.

Sondaı-aq Serik Jumanǵarın korporatıvtik tabys salyǵynyń mólsherlemesi ósetin salalardy atady.