Satýshy bar, alýshy joq: Kókshetaýda jyljymaıtyn múlik naryǵy daǵdarysqa ushyrady
Kókshetaýda jyljymaıtyn múlik naryǵy qıyn kezeńdi bastan ótkerip jatyr. Sharyqtap turǵan jańa páterdiń baǵasy men aılyqtyń ózge óńirlermen salystyrǵanda tómen bolýynan baspanaǵa muqtaj kóp turǵynnyń ıpotekaǵa qoly jetpeı otyr. Osynyń saldarynan jyljymaıtyn múlik agenttikteri men rıeltorlardyń bazary tarqap otyrǵan jaıy bar, dep habarlaıdy QazAqparat tilshisi.
Kókshetaýda satýǵa qoıylǵan páterlerdiń neshe túri bar. Onyń ishinde quny júzdegen mıllıonnan asatyn elıtalyq baspana men bıýdjettik ekonom-klass páterlerdi de kezdestirýge bolady.
Birine kosmetıkalyq, endi birine dızaınerlik jóndeý jumysy júrgizilgen, sondaı-aq jıhazy baryn da, joǵyn da taba alasyz.
Kókshetaýda páter saýdasymen aınalysatyn ondaǵan jyljymaıtyn múlik agenttigi bar.
Salada jıyrma jylǵa jýyq tájirıbesi bar Anna Brashkonyń málimetinshe, búgingi tańda jańadan salynǵan turǵyn úıdegi páterdiń ár sharshy metri — orta eseppen 250-280 myń teńge.
«Jańa páterdiń baǵasy aýmaǵyna jáne ornalasqan aýdanyna baılanysty, qalanyń shetki aýdandarynan góri, árıne ortalyǵynda páter baǵasy qymbattaý. Máselen, jańa páterlerdiń aýdany 1 bólmeli — 35-42 sharshy metr, 2 bólmeli — 45-70 sharshy metr, 3 bólmeli — 68-120 sharshy metr shamasynda. Osyny ortasha 250-280 myń teńgege kóbeıtinińiz. Biraq satyp alýshylar jańa páterdiń ishki árileý jumystary úshin qosymsha aqsha salýy kerek bolady. Oǵan qosa, qurylys materıaldarynyń qunyn qosyńyz. Al ekinshi naryqtaǵy páterlerge keletin bolsaq, 1 bólmeli — 10-13 mıllıon teńge, 2 bólmeli — 12-14 mıllıon teńge, 3 bólmeli — 15-19 mıllıon teńge, 4 bólmeli — 17-24 mıllıon teńgeniń shamasynda», — deıdi rıeltor.
Mamannyń aıtýynsha, páter ıeleri baspanasyn naryq baǵasynan 2-3 mıllıon, tipti 5 mıllıon teńgege qymbatqa satqysy keledi. Mundaı páterler jyldar boıy saýdada turady, satylmaıdy.
Bul jerde eski páterlerdi ekinshi deńgeıli bankter kepilge alýǵa asyqpaıtyn kórinedi.
«Qaıtken kúndede páter satyp alýshynyń bankten beriletin belgili bir somadan bólek ústine qosatyn óziniń jınaǵan jeke aqshasy jáne joǵary aılyǵy bolýy kerek. Al, Kókshetaýda anaý aıtqandaı joǵary aılyq alatyn jumys oryndary joq. Buǵan qosa, ishetin tamaǵyń, kıetin kıimiń bar. Ekinshi deńgeıli bankter eski úılerge ıpoteka rásimdeı bermeıdi. Sol sebepti kóbi qaltasyna qarap, jańa nemese bertinde salynǵan bir-eki bólmeli arzan pátermen shekteledi. Osynyń barlyǵy jyljymaıtyn múlik naryǵyna keri áserin tıgizip otyr», — dep túsindirdi rıeltor.
Mamandar atap ótkendeı, qazirgi kezde oblys ortalyǵyndaǵy jyljymaıtyn múlik naryǵynyń bazary bir sózben aıtqanda tarqap otyrǵan jaıy bar.
«Búgin maǵan tek satýshylar men notarıýstar ǵana qońyraý shalady. Satyp alýshylar tarapynan múldem qońyraý joq. Habarlasqannyń ózinde 7-8 mıllıon teńgege deıingi baspana qarastyrýdy suraıdy. Qazir mundaı baǵa joq. Sońǵy jarty jylda bir ǵana páter satyldy. Onyń ózi joǵary qabattaǵy eski páter, bankter ıpoteka rásimdeýden bas tartqan soń, ıesine qolma-qol aqshaǵa 7 mıllıon teńgege satýǵa týra keldi. Al, jańa úılerdegi páterler kóbi salynyp bitpeı jatyp satylyp ketedi, ıaǵnı qurylys kompanııalary úleskerlermen jumys isteýge tyrysady», — deıdi Arman esimdi rıeltor.
Resmı málimetke súıensek, búgingi kúni Kókshetaý qalasynda tórt sanat boıynsha 9 614 adam páter kezeginde tur. Olardy baspanamen qamtamasyz etý máselesi birtindep sheshilip jatyr.
Aqmola oblystyq qurylys, sáýlet jáne qalaqurylysy basqarmasynyń málimetinshe, «Nurly jer» memlekettik baǵdarlamasyn iske asyrý barysynda bes jyldyń ishinde oblysta 2,8 mln sharshy metr turǵyn úı nemese 24,4 myń baspana paıdalanýǵa berildi.
Halyqtyń áleýmettik osal toptary men jergilikti organdarda kezekte turǵandar úshin 2 020 jalǵa beriletin jáne 844 kredıttik páter salyndy.
Elektr jáne sýmen jabdyqtaýdyń ınjenerlik jelilerimen jeke turǵyn úı qurylysy úshin 2 132 jer ýchaskesi jáne Býrabaı aýdanynda 938 jer ýchaskesi sýmen jabdyqtaý jelilerimen qamtamasyz etilgen.
Al, 2023 jyly halyqtyń áleýmettik osal toptary úshin 8 jalǵa beriletin kóppáterli turǵyn úıdi nemese 306 páterdi, 7 kredıttik turǵyn úıdi nemese 380 páterdi paıdalanýǵa berý josparlanǵan.
