«Satýrn» dıskvalıfıkatsııadan keıin Erkebulan Toqtardy jekpe-jekke shaqyrdy
ASTANA. KAZINFORM — Ózbekstandyq MMA faıteri Oǵabek «Satýrn» Abdýmýmınov qazaqstandyq sportshy Erkebulan Toqtarǵa úndeý jasap, ony jekpe-jekke shaqyrdy, dep habarlaıdy INFORMSPORTS.
Abdýmýmınov qarsylasymen Qyrǵyzstanda MMA erejesi boıynsha kezdesýge daıyn ekenin málimdedi.
- Erkebulan menimen MMA boıynsha judyryqtasatynyn aıtyp, keleke etti jáne Instagram paraqshasynda storıs jarııalady. Jaraıdy, qalaı bolǵanda da, men de jańa ǵana jekpe-jekten shyqtym. Qarsylasymnyń áreketi men tóreshiniń sheshiminen keıin túsiniksiz jaǵdaıda júrmin. Biraq taǵdyrdyń jazǵanyn kóremiz. Erkebulan, men senimen Qyrǵyzstanda judyryqtasýǵa daıynmyn. 70 keli salmaqqa túse alsań, jaqsy bolar edi. BMF belbeýi úshin MMA jekpe-jegin ótkizetin ýaqyt keldi. Úsh raýnd bolsyn, bes raýnd bolsyn – bárine daıynmyn. Biraq sen óz sózińe jaýap bere almaısyń. Muny taǵy da qaıtalaımyn. BMF belbeýi 70 keli salmaqta sarapqa salynady. Eger sózińde turatyn bolsań, kezdesemiz. Meni storıske salyp, túrli áńgime aıttyń. Endi kóreıik. Men daıynmyn, – dedi Abdýmýmınov.
Aıta keteıik, buǵan deıin Erkebulan Toqtar Instagram jelisinde qarasha aıynda Qazaqstanda ótetin týrnırde «Satýrndy» esh qıyndyqsyz jeńetinin málimdegen bolatyn.
Eske salaıyq, Tashkentte ótken IBA Nomad 16 judyryqtasý týrnırinde Oǵabek Abdýmýmınovtyń qazaqstandyq Ádilet «Ýpýchýk» Aıtjanovqa qarsy debıýttik kezdesýi janjalmen aıaqtaldy.
Jekpe-jektiń birinshi raýndynda «Satýrn» tóreshi kezdesýdi toqtatqannan keıin qarsylasynyń basynan qatty soqqy jasaǵan. Osy áreketi úshin ózbekstandyq sportshy dıskvalıfıkatsııalanyp, jeńis Ádilet Aıtjanovqa berildi.
Osy oqıǵadan keıin Abdýmýmınov Erkebulan Toqtarǵa ashyq túrde shaqyrý tastap, 70 keli salmaqta BMF belbeýi úshin judyryqtasýǵa daıyn ekenin jetkizdi.
Aıta ketelik Erkebulan Toqtardyń kelesi qarsylasy kim bolady: úsh úmitker belgili bolǵan edi.
