Sátsiz ekpeden keıin qyzylshaǵa vaktsına salynbaıdy degen aqparat - jalǵan

ASTANA. KAZINFORM - Áleýmettik jelilerde Qazaqstanda «sátsiz ekpelerden» keıin qyzylshaǵa qarsy vaktsınatsııa naýqany toqtatyldy degen aqparat shyndyqqa sáıkes kelmeıdi, dep habarlaıdy QR Densaýlyq saqtaý mınıstrliginiń Sanıtarlyq-epıdemıologııalyq baqylaý komıetiniń baspasóz qyzmeti.

Qyzylsha boıynsha epıdemıologııalyq jaǵdaı baqylaýda. Vaktsınatsııa elimizdiń barlyq óńirlerinde Qazaqstan Respýblıkasynyń Ulttyq profılaktıkalyq egý kúntizbesine sáıkes josparly túrde júrgizilip keledi.

Elde qyzylshanyń aldyn alý úshin qyzylshaǵa, qyzamyqqa jáne epıdemııalyq parotıtke qarsy biriktirilgen vaktsına qoldanylady. Atalǵan vaktsına Qazaqstanda 10 jyldan astam ýaqyt boıy 1 jas jáne 6 jastaǵy balalardy josparly ımmýndaý sheńberinde qoldanylyp keledi jáne ózin tıimdi ári qaýipsiz profılaktıkalyq qural retinde kórsetti. Bul vaktsınalar álemniń kóptegen elderinde keńinen paıdalanylady.

Qoldanylyp otyrǵan vaktsınanyń óndirisi Dúnıejúzilik densaýlyq saqtaý uıymy tarapynan sertıfıkattalǵan, bul onyń sapa, tıimdilik jáne qaýipsizdik boıynsha halyqaralyq standarttarǵa sáıkestigin rastaıdy.

Aǵymdaǵy kezeńdegi jaǵdaı boıynsha Qazaqstan Respýblıkasynda atalǵan vaktsınany qoldanýǵa baılanysty ádetten tys reaktsııalar nemese asqynýlar tirkelgen joq.

- Azamattardy sabyr saqtaýǵa jáne memlekettik organdar men densaýlyq saqtaý uıymdarynyń resmı aqparat kózderinen alynǵan aqparatqa senýge shaqyramyz, - delingen habarlamada.

Osyǵan deıin Densaýlyq saqtaý mınıstrligi qyzylsha men tumaý tirkelip jatqanymen, jaǵdaı baqylaýda ekeni týraly málimdegen bolatyn.