Sátsiz kezeń aıaqtaldy: «Barys» komandasy «Metallýrgty» jeńe bastady
ASTANA. 2 jeltoqsan. QazAqparat - Astana qalasynyń «Barys» hokkeı klýby syrt alańda «Metallýrg» (Reseı, Magnıtogorsk) komandasyn utty.
Bul oıyn asa qyzyqty ári tartysty ótti. «Barystyń» hokkeıshileri esepti birinshi bolyp ashty. Naıdjel Doýstyń keremet soqqysynan keıin shaıba qarsylastyń qaqpasynan tabyldy. Ekinshi kezeńniń basynda «Metallýrg» tarazy basyn teńestirdi. Úsh mınýttyń ishinde Astana qalasynyń hokkeı klýby taǵy da alǵa shyqty. Biraq úshinshi kezeńde Metallýrg quramasynyń hokkeıshisi Tım Brent dýbl jasap, esepti teńestirip ketti. 2:2. «Barys» óz shabýyldaryn údetti. Sonyń arqasynda úshinshi shaıba soǵyldy. Dastın Boıdtyń soqqysynan keıin shaıba «Metallýrgtyń» oıynshysy E.Tımkınniń konkıine tıip, V.Koshechkınniń qaqpasyna biraq kirdi. Esep - 3:2. Osydan keıin «Metallýrg» esepti teńestirý úshin baryn saldy. «Barystyń» erejeni buzyp, eki hokkeıshige kem quramda oınaǵanyn paıdalanyp, qaqpashynyń ornyna qosymsha bir oıynshyny da shyǵaryp kórdi. Alaıda «Barystyń» qorǵanysyn buza almady. Brendon Bochenskıdiń esepti 4:2-ge jetkizýge tamasha múmkindigi boldy. Shaıba bos turǵan qaqpaǵa baǵyttaldy. Biraq ol shtangaǵa tıdi. Oıynnyń aıaqtalýyna deıin 10 sekýndtaı qalǵanda «Metallýrg» tarazy basyn teńestirip ketti. Overtaımda jeńimpaz anyqtalǵan joq. Al býllıt serııasynda «Barystyń» mereıi ústem boldy. Roman Starchenkonyń dál tıgizgen soqqysy komandaǵa jeńis syılady. Qorytyndy esep - 4:3 (B).
Aıta keteıik, magnıtogorlyq «Metallýrg» hokkeı klýby «Barys» úshin ońaı qarsylas emes. Ótken jylǵy chempıonatta eki komanda tórt ret kezdesken bolatyn. Sol oıyndardyń barlyǵynda da «Metallýrgtyń» mereıi ústem boldy. Bıylǵy chempıonat aıasynda ótken alǵashqy oıynda da «Barys» ony jeńe almaı, 1:2 esebimen jol bergen. Osy joly sátsiz kezeń aıaqtaldy deýge bolady. Bul machtan keıin Astana qalasynyń hokkeı klýby eki upaıǵa qol jetkizip, barlyǵy 64 upaımen jalpytýrnırlik kestede 4-ornyn saqtap keledi.
