«Sátpaevtyń goly»: Sheteldik bloger qazaqstandyq jankúıerlerdiń belsendiligine tánti boldy
ASTANA. KAZINFORM — Matchday USA Instagram-paraqshanyń avtory Qazaqstan quramasynyń shabýylshysy Dastan Sátpaevtyń londondyq «Chelsı» sapyndaǵy debıýttik golynan keıin qazaqstandyq jankúıerlerdiń belsendiligine tánti boldy, dep habarlaıdy Sports.kz.
— Maýsym aldyndaǵy daıyndyq barysynda álemdegi eń myqty, biraq kópshilikke beımálim jankúıerlerdiń birin tapqan sekildimiz? Bul Brazılııa da, Norvegııa da, Argentına da emes. Bul — Qazaqstan. Sátpaev qaqpa aldynda dopty qabyldap, 17 jastaǵy fýtbolshy jyldamdyǵyn arttyryp, eki qorǵaýshyny artta qaldyrdy. «Vestern Sıdneı» qaqpashysy Djordan Holmspen betpe-bet kelip, dopty qaqpaǵa dál baǵyttady. Dál osy sátten keıin búkil álem Qazaqstan jankúıerleriniń qanshalyqty kóp ekenin bildi. Essýgonyń goly jarııalanǵan jazba 200 myń laık jınady, Gıttenstiń goly shamamen 177 myń, Joaý Pedronyń goly 160 myń laık aldy. Al qazaqstandyq Sátpaevtyń goly jarııalanǵan jazba 800 myń laık jınady. Pikir sany 200 myńǵa jetti. Barlyq jerden Qazaqstan jankúıerlerin kórýge bolady. Habı Alonso, mundaı qarqynmen Sátpaevty negizgi quramǵa qosýǵa týra keledi. Óıtkeni onymen birge álemdegi eń myqty, biraq kópshilikke beımálim jankúıerler qaýymynyń birine ıe bolasyz, — dedi paraqsha avtory.
Keıin bul jazbanyń kórsetkishteri odan ári ósti. «Chelsıdiń» resmı paraqshasynda jarııalanǵan Sátpaevtyń goly túsirilgen vıdeo bir mıllıonnan astam laık jınap, 350 myńnan astam pikirge ıe boldy. Pikirlerdiń basym bóligin qazaqstandyq qoldanýshylar qaldyrǵan. Sheteldik BAQ ta jas shabýylshyny tutas eldiń jappaı qoldaýyna erekshe nazar aýdardy.
Sátpaev «Vestern Sıdneı Ýonderers» komandasymen ótken joldastyq matchtyń jetinshi mınýtynda esep ashty. Ol Raıan Kavýma-Makkýınniń pasynan keıin dopty qaqpaǵa dál baǵyttady. Matchta «Chelsı» 6:4 esebimen jeńiske jetti. Al Sátpaevtyń goly Habı Alonsonyń jetekshiligimen óner kórsetken komanda úshin alǵashqy gol boldy.
Aıta keteıik, Qazaqstan quramasynyń 17 jastaǵy shabýylshysy Dastan Sátpaev Londonnyń «Chelsı» klýby sapyndaǵy alǵashqy golyn soqqan bolatyn.
Buǵan deıin Dastan Sátpaev Qazaqstannyń eń qymbat oıynshysy atandy.
