Sátpaevtaǵy qoqystan tabylǵan náresteniń anasy basqa qalalardan da izdestirilýde
QARAǴANDY. QazAqparat - Sátpaev qalasyndaǵy qoqys jáshiginen tabylǵan náresteniń anasy izdestiriletin qalalar men aýyldar tizimi kóbeıdi, dep habarlaıdy «QazAqparat» HAA tilshisi.
Balanyń anasyn izdeý jumystary Sátpaev qalasynan 28 kılometr qashyqtyqta ornalasqan Jezqazǵan kenti men 70 kılometr jerde ornalasqan Keńgir aýyldarynan bastaldy. Sondaı-aq, izdeý jumystary Jezqazǵan qalasynda da júrgizilip jatyr.
«Búgingi tańda óńirdegi júkti jáne bosanyp alǵan áıelderdiń barlyǵy tekserildi. Olardyń balalarynyń jaǵdaıy birqalypty, qajetti kútimderin alyp jatyr», - dep habarlady Qaraǵandy oblysy densaýlyq saqtaý basqarmasynyń Jezqazǵan aımaǵyndaǵy ókildigi.
Jańa týǵan náreste memleket esebinen jerlendi. QK 100 baby «Jańa týǵan náresteni anasynyń óltirýi» boıynsha qylmystyq is qozǵaldy.
Aıta keteıik, 16 shilde kúni kommýnaldyq qyzmet jumysshylary Sátpaev qalasyndaǵy Jastar kóshesiniń boıyndaǵy qoqys jáshiginen jas náresteniń óli denesin taýyp alǵan bolatyn. Atalǵan bap boıynsha tórt jylǵa deıin bas bostandyǵynan aıyrý jazasy qarastyrylǵan. Sot-medıtsınalyq saraptamasynyń bastapqy tekserýi boıynsha kúshtep óltirý belgileri tabylmaǵan. Degenmen, polıtsııa qyzmetkerleri balany óltirgen degen boljam jasap otyr.
