Sátpaevta jańartylǵan balabaqsha 300-den astam balany mektepke deıingi bilimmen qamtyp otyr
Ulytaý oblysynyń Sátpaev qalasynda qala quraýshy kásiporyn «Aqbota» bóbekjaı-baqshasyn jóndeýden ótkizdi. Osynyń arqasynda 320 bala zamanaýı jáne jabdyqtalǵan toptarda mektepke deıingi bilim alady, dep habarlaıdy Kazinform agenttiginiń tilshisi.
Sátbaev qalasynyń bilim bóliminiń «Aqbota» balabaqshasy 1994 jyly paıdalanýǵa berilgen. Balabaqsha 320 balaǵa jáne 14 topqa arnalǵan. Otyz jyl ishinde nysan birde bir ret kúrdeli jóndeýden ótpegen. Saldarynan 2023 jylǵy tamyzda tótenshe jaǵdaılardyń aldyn alý jáne joıý jónindegi komıssııanyń sheshimimen balabaqshanyń jumysy toqtatylyp, tehnıkalyq tekserý júrgizilgen. Sodan keıin mamandar dereý smetalyq qujattama daıyndaýǵa kirisip, 2024 jyldyń mamyrynda «Qazaqmys» korporatsııasy óz qarajaty esebinen kúrdeli jóndeýdi bastady.
Jumys bekitilgen kestege sáıkes aıaqtaldy, sonyń arqasynda 320 bala jańartylǵan balabaqshada bilim alý múmkindigine ıe boldy. Kúrdeli jóndeý jumystary barysynda shatyr tolyǵymen jańartyldy. Qurylysshylar syrtqy qasbetti fıbrotsement panelmen qaptady. Balabaqshanyń ishki qabyrǵalary men tóbeleri gıps kartonmen jáne sylaqpen qaptalǵan. Sodan keıin olar ashyq túske boıaldy.
— Jóndeý kezinde esikter men terezeler aýystyryldy, edender jańartyldy, balalardyń barlyq oıyn toptarynda jyly edender jasaldy. Jylýmen, sýmen jabdyqtaý qubyrlary tolyǵymen jańartyldy. Barlyq jeldetý qubyryn aýystyrdyq. Jaryqtandyrý, as ázirleý júıelerin jańarttyq. Barlyq top pen dálide, balabaqshanyń syrtynda beınekameralar men órt dabyly qurylǵylary ornatyldy. Balalar alańdary zamanaýı jabdyqtarmen jabdyqtalǵan, tipti balalar joldary da qarastyrylǵan. Balabaqshanyń aınalasyna aǵash egilip, asfalt tolyǵymen jańartyldy, — deıdi «Aqbota» balabaqshasynyń dırektory Janar Baıbatyrova.
«Qazaqmys» korporatsııasy kúrdeli jóndeýmen qatar balabaqshany jabdyqpen qamtamasyz etti. Kompanııa esebinen kereýetter men balalar jatyn bólmeleriniń tósek jabdyqtary jańartyldy, balalardyń oıyn bólmelerine arnalǵan damytý buryshtary, qabyldaý bólmelerindegi kıim shkaftary ornatyldy.
Sondaı-aq, balalar úshin sport bólmesi men mýzykalyq zal jabdyqtaldy. Olar zamanaýı jabdyqtarmen tolyqty. Budan basqa, balabaqshaǵa Montessorı bólmesi jáne tuz bólmesi syıǵa tartylyp, jańa peshter men muzdatqyshtar ornatyldy.
— Búgin biz armandaǵandaı, ádemi, jarqyn, jyly, zamanaýı, tartymdy oıyn alańdary bar balabaqshamyz jumys istep jatyr. Biz balabaqshamyzdy kúrdeli jóndeýden ótkizgen «Qazaqmys» korporatsııasyna alǵys aıtamyz, — deıdi Janar Baıbatyrova.
Aıta ketelik elde 1 mıllıonǵa jýyq bala balabaqshaǵa barady.