Sátpaevta pedofıldi qamaý merzimi taǵy bir aıǵa uzartyldy
QARAǴANDY. QazAqparat - Qaraǵandy oblysynyń Sátpaev qalasynda bes jasar qyzǵa zorlyq kórsetti dep aıyptalǵan 50 jastaǵy turǵyndy qamaýda ustaý merzimi uzartyldy, dep habarlaıdy QazAqparat.
Tergeýshiniń atyshýly isti tergeýdi uzartý jónindegi sheshimimen qatar, sot kúdiktini úshinshi aıǵa qamaýda qaldyrý merzimin de uzartty. Qylmystyq is júrgizý kodeksindegi aldyn ala tergeýge qarastyrylǵan eki aı ýaqyt jetkiliksiz boldy. Іs boıynsha birqatar saraptama aıaqtalmaǵan, sonyń ishinde balaǵa zorlyq kórsetken kezdegi aqyl-esiniń durystyǵyna psıhologııalyq-psıhıatrıalyq saraptama jasaý da bar.
«Sot Sátpaev ІІB tergeýshisiniń usynymhaty boıynsha 50 jastaǵy kúdiktini qamaýda ustaý merzimin úshinshi aıǵa uzartty», - dep habarlady qalalyq sottan.
Eske sala ketsek, 23 shilde kúni 40 jastaǵy Sátpaev turǵyny 5 jastaǵy qyzynyń joǵalyp ketkeni týraly habarlaǵan bolatyn. Sol kúni polıtsııa qyzmetkerleri 50 jastaǵy jergilikti turǵyndy ustady, onyń jatyn bólmesinen 5 jastaǵy búldirshin tabyldy.
