Sátbaev kanalynan Astanaǵa sý tartý toqtatyldy – mınıstr

ASTANA. KAZINFORM – Astanada sý kólemi jetkilikti bolǵandyqtan Qanysh Sátbaev kanalynan sý tartý toqtatyldy. Bul týraly Sý resýrstary jáne ırrıgatsııa mınıstri Nurjan Nurjigitov málim etti.   

«Q. Sátbaev kanaly arqyly biz ótken jyly Astana sý qoımasyna 43 mln tekshe metr jáne Nura ózenine 50 mln sý jiberdik. Bıyl 1 qańtardan bastap sý jiberý toqtatyldy, sebebi Astanada táýliktik sý kólemi jetkilikti. Kóktemde sý tasqyny kezeńin baqylaımyz, bıyl qar qalyń jaýdy. Sý qory qalypty deńgeıde bolady dep oılaımyz, - dedi Nurjan Nurjigitov Májiliste ótken «Respýblıkadaǵy sarqyndy sýlardy qaıta paıdalanýdyń problemalary men perspektıvalary» atty dóńgelek ústelden keıin BAQ ókilderiniń saýalyna jaýap bere turyp. 

Sondaı-aq, mınıstr qajet jaǵdaıda Sátpaev kanalynan Astana sý qoımasyna sý tartylatynyn aıtty.

Eske sala ketsek, byltyr jyl sońynda Astana ákimi resmı túrde Astanada sý tapshylyǵy joq ekenin málimdegen edi. 

Ákimniń aıtýynsha, elordada aldaǵy birneshe jylǵa jetetin sý qory bar.