Sátpaev qalasynyń turǵyny 100 keliden astam marıhýanany aýlasynda saqtaǵan
JEZQAZǴAN. KAZINFORM — Ulytaýda «Qarasora-2025» is-sharasy barysynda 100 keliden astam marıhýana men qarý-jaraq tárkilendi. Bul týraly Polisia.kz jazdy.
Ulytaý oblystyq polıtsııa departamentiniń esirtki qylmysyna qarsy is-qımyl basqarmasy qyzmetkerleri prokýratýramen birlesip, «Qarasora-2025» jedel-profılaktıkalyq is-sharasy aıasynda esirtkiniń zańsyz aınalymyn toqtatýǵa baǵyttalǵan jedel-izdestirý jumystaryn júrgizdi. Іs-shara barysynda Jezqazǵan qalasyna jaqyn ornalasqan Keńgir kentindegi jeke turǵyn úıdiń garajyna tintý jasaldy.
Tekserý kezinde polıtsııa qyzmetkerleri alty qap jáne bir túıinshekke salynǵan qurǵaq marıhýanany taýyp, tárkiledi. Saraptama nátıjesinde onyń jalpy salmaǵy 103 keli ekeni anyqtaldy.
Sonymen qatar garajdan «Vepr» oıyq uńǵyly ańshy myltyǵy, oǵan arnalǵan 32 patron jáne elektrondy tarazy tabyldy. Úı aýlasynan bir túp qarasora ósimdigi tárkilendi.
— Tergeý barysynda barlyq tárkilengen zattardyń 37 jastaǵy Sátpaev qalasynyń turǵynyna tıesili ekeni belgili boldy. Qazirgi ýaqytta kúdikti ýaqytsha ustaý ızolıatoryna qamaldy, — delingen habarlamada.
Atalǵan derek boıynsha sotqa deıingi tergeý amaldary júrgizilip jatyr.