BUU Iranǵa qarsy sanktsııalardyń qaıta kúshine engenin rastady

ASTANA. KAZINFORM — Halyqaralyq atom energııasy agenttiginiń (MAGATE) Basqarýshylar keńesiniń otyrysy ótti. Jeksenbi kúni BUU Iranǵa qarsy sanktsııalar qaıta kúshine engenin rastady, dep jazdy Sınhýa agenttigi.

— Qaýipsizdik keńesiniń 2231 (2015) rezolıýtsııasynyń 11 jáne 12-tarmaqtarynda kórsetilgen rásimge sáıkes, 27 qyrkúıek kúni shyǵys jazǵy ýaqytymen saǵat 20:00–de, 1696 (2006), 1737 (2006), 1747 (2007), 1803 (2008), 1835 (2008) jáne 1929 (2010) rezolıýtsııalaryndaǵy barlyq erejeler 2015 jylǵy 20 shildede qabyldanǵan 2231 rezolıýtsııasyna deıingi jaǵdaıdaǵydaı kúshine enedi», — delingen BUU Bas hatshysynyń baspasóz qyzmeti taratqan málimdemede.

Habarlamada atap ótilgendeı, BUU Qaýipsizdik keńesiniń 1737 rezolıýtsııasy boıynsha qurylǵan komıtet júrgizetin sanktsııalar tizimi qalpyna keltirildi. Bul tizimge 2231 rezolıýtsııasy qabyldanǵanǵa deıin engizilgen 43 jeke tulǵa men 78 zańdy tulǵa kiredi.

Ótken aıda Frantsııa, Ulybrıtanııa jáne Germanııa «snapback» dep atalatyn mehanızmdi resmı túrde iske qosty. Bul mehanızm Iran 2015 jylǵy ıadrolyq kelisimdi (resmı ataýy — Birlesken jan-jaqty is-qımyl jospary) buzdy dep tanylǵan jaǵdaıda, 30 kún ishinde BUU sanktsııalaryn qaıta engizýge múmkindik beredi.

19 qyrkúıekte BUU Qaýipsizdik keńesi Iranǵa qatysty sanktsııalardy jeńildetýdi uzartý týraly rezolıýtsııany qabyldamady. Juma kúni ıadrolyq kelisim men 2231 rezolıýtsııasynyń merzimin alty aıǵa uzartýdy kózdegen keıingi rezolıýtsııa da qabyldanǵan joq.

Aıta keteıik, BUU Qaýipsizdik Keńesi Iranǵa qatysty sanktsııalardy toqtata almady.

Artynsha Iran BUU sanktsııalarynyń qaıta kúshine enýine qatań jaýap beretinin málimdedi.