Satırık Kópen Ámirbek jemqorlyqpen kúreske karıkatýrany tartýdy usyndy

NUR-SULTAN. QazAqparat – Sybaılas jemqorlyqpen kúreske karıkatýrashylardy da tartý kerek. Bul týraly QR Ulttyq akademııalyq kitaphanasynda ótken «Parasat joly» jobasynyń tanystyrylymynda satırık Kópen Ámirbek aıtty, dep habarlaıdy QazAqparat tilshisi.

«Buryn «Ara» satıralyq jýrnalynyń atyn estigen adam eleń ete qalar edi. Qoǵam jaqsy qasıetterinen aıyrylyp qaldy. Statıstıkaǵa kóz júgirtsem, myńnan astam memlekettik qyzmetkerge qatysty qylmystyq is qozǵalǵan», - deıdi satırık Kópen Ámirbek.

Ol sybaılas jemqorlyqqa qarsy jumys atqarylyp jatqanyn, sol jumystardyń biri – búgingi kezdesý ekenin de aıtty.

«Byltyr 80 mıllıon turǵyny bar Germanııaǵa baryp qaıttym. Ol jaqta sońǵy 30 jylda birde bir sheneýnikke qatysty qylmystyq is qozǵalmaǵan. Mine, qaıdan úlgi alý kerek! Al bizdiń qoǵamdaǵy jaǵdaı qalaı? Aqushtap Baqtygereeva durys aıtady, qazaqtar balasyn qalaı tárbıelegen? «Balam, uıat bolady» degen úsh-aq aýyz sózben tárbıelegen. Qazaq halqynda osy máselege qatysty qanshama maqal-mátel, qanatty sóz bar», - deıdi ol.

Ol sybaılas jemqorlyqpen kúresý úshin osy taqyrypta jumys isteıtin karıkatýrashylarǵa arnalǵan baıqaý uıymdastyrýǵa bolatynyn alǵa tartady.

«Bul máselege synı kózben qaraý kerek, sol sebepti «Ara» jýrnalyn qazirgi zaman talabyna saı jańa formatta shyǵara bastaý kerek. Mysaly, saıt ashýǵa bolady. Para alatyn, jemqorlyqqa jaqyn adamdarǵa qatysty karıkatýradan baıqaý ótkizý kerek. Sonda jumys alǵa basady. Usynysym oryndy dep tapsańyzdar – men qol ushyn sozýǵa daıynmyn», - deıdi satırık Kópen Ámirbek.