Satyp alýshynyń sómkesin tekserýge kim quqyly
ASTANA. KAZINFORM — Saýda oryndaryndaǵy qaýipsizdik qyzmetkerleri kelýshilerdiń sómkesin tekserýge quqyly ma? Bul suraqqa «Jibek Joly» arnasyndaǵy «Búgin Live» baǵdarlamasynda Saýda jáne ıntegratsııa mınıstrligi Tutynýshylardyń quqyqtaryn qorǵaý komıtetiniń basqarma basshysy Erkebulan Taǵashov jaýap berdi.
— Saýda núktesiniń basshysy men satyp alýshy arasynda kelisimshart bolady. Sol shart talaptaryna saı kúzet qyzmeti sómkeni arnaıy jáshikterge salý kerektigi týraly keńes beredi jáne dúkennen shyqqanda qol dorbany kórsetýdi suraıdy. Biraq bul mindetti túrde bárin ashyp kórset degen sóz emes. Tutynýshy oǵan mindettelmeıdi. QR ÁQK-te kórsetilgen. Eger sómkeni kórsetý kerek bolsa, onda kýágerlerdi shaqyryp, barlyǵyn zań aıasynda jasaý kerek ári tek polıtsııa qyzmetkerleri ǵana jekeniń múlkin tekserýge quqyly. Al kúzet qyzmetkeriniń ashyp-tekserý quzyreti joq, - deıdi Erkebulan Taǵashov.
Onyń sózinshe, qandaı da bir azamat dúkennen urlyq jasady dep kúdiktense, aldymen quqyq qorǵaý qyzmetkerlerin shaqyrýy tıis. Odan keıin ǵana tekserý jumystaryn jasaı alady.
— Elde saýda jáne tutynýshylardyń quqyqtaryn qorǵaý komıteti bar. Olar zańǵa saı qos taraptyń da quqyǵyn qorǵaıdy. Saýda qyzmetterin retteý týraly zańda tutynýshylardyń múmkindigin shekteýge bolmaıtyny jazylǵan. ıAǵnı, eshkim sizge sómkeńdi jáshikke salmasań, dúkenge kirgizbeımin dep aıta almaıdy, - deıdi ol.
Deıturǵanmen, maman pikirinshe óz quqyǵyn bilip, qorǵap júrgen qazaqstandyqtar da az emes. Máselen, 2025 jyldyń alǵashqy bes aıynda otandastarymyz 800 mıllıon teńgeden astam qarjysyn qaıtaryp alǵan. Shaǵymdar kóbinese sapasyz taýarlar, oryndalmaǵan qyzmetter, sondaı-aq rásimdelmegen nemese ýaqytyly berilmegen jyljymaıtyn múlikke qatysty eken.
Ekinshi másele, satyp alǵan taýardy keri qaıtarýǵa qatysty. Tutynýshylar tek sapaly taýarlarly ǵana qaıtara alady.
— Sapaly taýardy qaıtarý degenimiz — ol satyp alýshy tapsyrys bergen zaty kóńilinen shyqpasa nemese onyń fıskaldy chegi, saýda bırkasy bar bolsa kez kelgen ýaqytta keri qaıtarýǵa quqyly. Al taýar sapasyz bolsa, ıaǵnı alǵannan keıin istemeı qalsa, jyrtyq bolsa onda tek arnaıy belgilengen kepildik merzimi ishinde ǵana qaıtara alady. Alaıda óndirýshi kepildik merzimin taýar syrtynda kórsetýi kerek. Eger ol belgilenbegen jaǵdaıda tutynýshy eki jyl ishinde alǵan zatyn qaıtarsa bolady, - dedi Tutynýshylardyń quqyqtaryn qorǵaý komıtetiniń basqarma basshysy.
Al taýaryńyzdy óndirýshi tarap qabyldamasa, arnaıy organdardyń kómegine júginesiz.
Aıta keteıik, Haval dıleri Jetisý oblysynda tutynýshylar quqyǵyn buzǵan sharttardy túzetti.