Satyp alý týraly zańnamadan «Samuryqqa» berilgen erekshelikter alynyp tastalýy múmkin

ASTANA. KAZINFORM – Premer-mınıstr Oljas Bektenov Májilis depýtatynyń «Samuryq-Qazyna» qorynyń bir kózden satyp alý júıesi Qazaqstan ekonomıkasyn tejep otyrǵany týraly saýalyna jaýap berdi.

- Qarjy mınıstrligi «Kvazımemlekettik sektordyń jekelegen sýbektileriniń satyp alýy» týraly Zańnan qorǵa qatysty erekshelikterdi alyp tastaý máselesin pysyqtap jatyr. Bul qadam áleýetti syn-qaterlerdi (strategııalyq máni bar ınvestıtsııalyq jobalardyń irkilisi jáne ınvestıtsııa tartýda týyndaýy múmkin qıyndyqtar) eskere otyryp iske asyrylady, - delingen jaýapta.

Úkimet basshysy Joǵary aýdıtorlyq palata qordyń qyzmetine memlekettik aýdıt júrgizip jatqanyn eske salady.

- Onyń qorytyndysy úshinshi toqsanda Parlamentte qaralady. Aýdıt nátıjesi boıynsha qor qyzmetin ári qaraı jetildirý baǵytynda qosymsha qorytyndy men usynymdar ázirlenedi, - dep jazady Oljas Bektenov.

Májilis depýtaty Ádil Jubanov Premer-mınıstrdiń atyna saýal joldap, «Samuryq-Qazyna» – Qazaqstan ekonomıkasynyń draıveri emes, tejeýishi bolyp turǵanyn aıtqan edi.

Al Joǵary aýdıtorlyq palatanyń tóraǵasy Álıhan Smaıylov «Báıterek» holdıngi, «Samuryq-Qazyna» qorynyń aktıvterdi basqarý qyzmetin synady.

Al depýtat Azat Perýashev «Samuryq-Qazyna» 1,25 trln teńge tabysynan memleketke dıvıdent tólemeı qoıǵanyn málim etken bolatyn.