Satyp alý salasyndaǵy 3,5 trln teńgeniń 1,9 trln teńgesi ǵana qazaqstandyq óndirýshilerge buıyrǵan

Premer-Mınıstr Álıhan Smaıylov «Qazaqstandyq qamtý 2.0» halyqaralyq forýmynda satyp alý salasynda ımporttyń úlesi azaımaı turǵanyn aıtty, dep habarlaıdy Kazinform agenttigi.

«Memleket basshysy bizdiń aldymyzǵa 3 jyl ishinde qazaqstandyq mazmundy 60%-ke deıin jetkizý boıynsha naqty mindet qoıdy. Ol úshin qajetti áleýet pen resýrstar bar. Bul, eń aldymen ımportqa táýeldilikti tómendetýdi talap etedi. Import úlesi áli de 46%-ti qurap otyr. Máselen, munaı-gaz salasynda satyp alýlardyń eń úlken úlesi 3 iri konsortsıýmǵa tıesili. Bul – búkil energetıka salasyndaǵy satyp alýlardyń 75%-y. Jyl basynan beri satyp alýlardyń kólemi 3,5 trln teńgeni qurady, onyń 1,9 trln teńgesi jergilikti mazmuny úlesine berilip otyr», - dedi ol.

Onyń sózinshe, taý-ken sektorynda satyp alynatyn otandyq taýarlardyń úlesi – 15%, mashına jasaýda – 13,5%, farmatsevtıkada – 20% ǵana.

«Báıterek» holdıngi jyl basynan beri bızneske 2,2 trln teńgeniń kóleminde qarjylyq qoldaý kórsetti. Sonyń ishinde, Qazaqstan damý banki arqyly 314 mlrd teńge bólindi. Ónerkásipti damytý qory jalpy quny 195 mlrd teńgeden asatyn jobalardy qarjylandyrdy. Qosymsha 300 mlrd teńgeniń jobalary boıynsha jumys jalǵasýda. «Damý» qory arqyly 115 mlrd teńgege tikeleı nesıeler berildi jáne bólingen sýbsıdııalar men kepildikterdiń arqasynda bankter bızneske 930 mlrd teńgeden astam nesıe berdi», - dedi Álıhan Smaıylov.