Satyp alǵan páterin 2 jyldyń ishinde qaıta satqandar 10 paıyz salyq tóleıdi

ASTANA. KAZINFORM — 2026 jyldan bastap satyp alǵan páterin 2 jyldyń ishinde qaıta satqandar 10 paıyz salyq tóleıdi. Bul týraly Qarjy mınıstrligi Memlekettik kirister komıteti Salyq ádisnamasy basqarmasy basshysynyń orynbasary Aıgúl Abbasova onlaın brıfıngide aıtty. 

— Qazir múlik salyǵynda mynandaı eskeretin jaıt bar. Páter satyp alyp, onyń bir jyldyń ishinde satyp jiberip, ústinen aqsha kórsem, sol kórgen aqshanyń 10 paıyzyn salyq retinde tóleımin. Jańa salyq kodeksinde osy kezeń uzartyldy. Qazir 1 jyl bolsa, 2026 jyldan bastap eki jyl merzim qoldanylady. Basqasha aıtsaq, satyp alǵan páterdi 2 jyldyń ishinde satyp, ústinen aqsha kórsem, sol tabystan 10 paıyz jeke tabys salyǵyn tóleıdi. Al páterdi óz atyńyzda 2 jyldan kóp merzim ustap satsańyz, ústinen kórgen aqshaǵa salyq salynbaıdy, — dedi ol.

Aıgúl Abbasova atalǵan norma bıyl páter satyp alǵandarǵa júrmeıtinin eskertti.

— Bul jerde 2 jyldyq merzim 2026 jyldyń 1 qańtarynan bastap satyp alynǵan múlikke ǵana qoldanylady. 2025 jyldyń 31 jeltoqsanyna deıin satyp alynǵan múlikke 1 jyldyq merzim qoldanylady, — dep túsindirdi maman.

Buǵan deıin birneshe páteriniń jıyntyq quny 450 mln teńgeden asatyn adamdarǵa múlik salyǵy 1,5 paıyz bolatynyn jazǵan edik.