Satylyp ketken kólikke salyq qalaı tólenedi
ASTANA. KAZINFORM – Satylyp ketken avtokóliktiń salyǵy qalaı esepteledi? Qarjy mınıstrliginiń Memlekettik kirister komıteti osy máselege qatysty túsinik berdi.
Kólik salyǵy salyq zańnamasynda belgilengen salyq mólsherlemesine sáıkes derbes esepteledi.
- Kólik salyǵy kólik quraly tirkeýden shyǵarylǵan kúnge deıin esepteletinin habarlaımyz. Eger salyq tóleýshi 2025 jyldyń kez kelgen aıynda kólik quralyn tirkeýden shyǵarǵan bolsa, salyq atalǵan kezeńge deıin ǵana esepteledi, - dep atalyp ótken komıtettiń Kazinform agenttigine bergen jaýabynda.
Demek, salyq somasy kólikti ıelenýdiń naqty kezeńi úshin esepteledi. Máselen, 2025 jyl ishinde kólik quralyn satyp alǵan/satqan jaǵdaıda, jyldyq salyqtyń eseptelgen somasy 12-ge bólinedi jáne menshik quqyǵynda naqty bolǵan aılar sanyna kóbeıtiledi. Bul rette satyp alýshy tarap kólik quraly satyp alynǵan aıdan bastap tóleıdi. Sondyqtan salyq tirkeý kezeńine baılanysty esepteledi, ıaǵnı ár adam kólikke ózi ıelik etken kezge ǵana jaýapty.
Eger kólik ıesine 2025 jyldyń basyna deıin satylǵan kólik boıynsha salyq somasy usynylǵan jaǵdaıda, mundaı kólik quralynyń ýákiletti organda esepten shyǵarylǵanyna kóz jetkizý qajet.
Aıta ketsek, Qazaqstanda bıylǵy 1 sáýirge deıin 2025 jylǵa eseptelgen salyq tólendi. Bul rette, 2025 jyly qoldanysta bolǵan 3 932 teńge aılyq eseptik kórsetkish (AEK) qoldanyldy.
2026 jylǵy 2 sáýirden bastap salyq tólemi keshiktirilgen ár kún úshin ósimpul esepteledi.
Salyq jáne eseptelgen ósimpul boıynsha bereshek bolǵan kezde, salyq organdary osy jylǵy 10 mamyrdan bastap májbúrlep óndirip alý sharalaryn qoldanady.
Budan buryn habarlanǵandaı, 2026 jylǵy 15 sáýirdegi jaǵdaı boıynsha 639 917 salyq tóleýshige qatysty 32,4 mlrd teńge kóleminde kólik salyǵy tólenbegen.