Satybaldy Dáýletalın kómir generatsııasyn damytýda nazarda ustalýy tıis qaǵıdattardy atady
ASTANA. KAZINFORM — Energetıkalyq qaýipsizdik jáne kómir generatsııasyn damytý ulttyq tózimdilik máselesi. Mundaı pikirdi Kásipodaqtar federatsııasynyń tóraǵasy Satybaldy Dáýletalın bildirdi.
— Energetıkalyq qaýipsizdik jáne kómir generatsııasy — bul turaqtylyq, jumys oryndary jáne óńirlerdiń bolashaǵy týraly másele. Biz Prezıdenttiń energetıkalyq ózin-ózi qamtamasyz etýdi nyǵaıtý jáne kómir generatsııasyn strategııalyq baǵyt retinde damytý qajettiligi týraly ustanymyn qoldaımyz. Qazaqstan úshin bul ulttyq tózimdilik máselesi. Senimdi energııasyz ónerkásip te, jańa óndirister de, tsıfrlyq ekonomıka da, ómir súrý sapasy da bolmaıdy, — dedi federatsııa basshysy.
Biraq ol nazardan tys qaldyrýǵa bolmaıtyn birneshe mańyzdy qaǵıdat bar ekenin aıtady. Birinshisi — eńbek qaýipsizdigi jáne eńbek jaǵdaılary.
— Kómir salasy men energetıka eńbekti qorǵaýdyń, ónerkásiptik qaýipsizdiktiń, jaraqattaný men kásiptik aýrýlardyń aldyn alýdyń eń qatań standarttary boıynsha jumys isteýi tıis, — dedi ol.
Federatsııa tóraǵasy ekinshi qaǵıdat retinde jańǵyrtý jáne tehnologııalardy atady.
— Eger kómir strategııalyq aktıv bolsa, demek ol aqylmen paıdalanylýy kerek. Zamanaýı ekologııalyq sheshimdermen, zııandy shyǵaryndylardy azaıtýmen jáne óndiristik qýattardy jańartýǵa naqty ınvestıtsııalar salýmen súıemeldenýi tıis, — dedi Satybaldy Dáýletalın.
Onyń paıymynsha, úshinshi qaǵıdat — áleýmettik jaýapkershilik.
— Kómir generatsııasynyń artynda qalalar men adamdardyń taǵdyry tur. Jańǵyrtýdyń shyǵyndary men zardaptary jumysshylar men óńirlerdiń ıyǵyna túsýine jol berýge bolmaıdy. Laıyqty jalaqy, áleýmettik baǵdarlamalar, kadrlar daıarlaý, kásiptik oqytý, eńbek ujymdaryn medıtsınalyq jáne áleýmettik qoldaý sharalary qarastyrylýy tıis. Bul rette kásipodaqtar syrttaı baqylaýshy emes, osy aýqymdy jobalardy iske asyrý aıasynda qaýipsiz eńbek jaǵdaılaryn qamtamasyz etýde jáne jumysshylardyń quqyqtaryn qorǵaýda tolyqqandy qatysýshy bolýǵa daıyn, — dedi ol.
Aıta keteıik, Memleket basshysy Qasym-Jomart Toqaev Ulttyq quryltaıtyń V otyrysynda Úkimetke 20 naýryzǵa deıin kómir óndirisin damytýdyń ulttyq jobasyn bekitýdi tapsyrdy.