Saty aýylyndaǵy jer daýy: ákimdik tekserý jumystaryn bastady

QONAEV. KAZINFORM — Kegen aýdanynyń ákimdigi Kólsaı kólderiniń eteginde ornalasqan Saty aýylyndaǵy jer daýyna qatysty pikir bildirdi.

Aýdan ákimdiginen málim etkendeı, jergilikti turǵyndardyń aýyl sharýashylyǵy maqsatyndaǵy ýchaskelerdiń úshinshi tulǵaǵa zańsyz berilýi týraly shaǵymdary negizinde prokýratýra Qazaqstan Respýblıkasy Jer kodeksiniń 146-babyna sáıkes tekserý júrgizip jatyr.

— Daýly jer telimderine qatysty materıaldar Almaty oblysynyń jer qatynastary basqarmasyna joldandy. Tekserý nátıjeleri boıynsha túpkilikti sheshim qabyldanady, — dep jaýap berdi ákimdikten Kazinform agenttiginiń saýalyna.

Sondaı-aq, Kegen aýdanynyń jer qatynastary jáne sáýlet, qala qurylysy bólimderi atalǵan jer telimderine túgendeý jumystaryn júrgizip jatyr.

Saty aýyly men onyń mańyndaǵy jer máselelerin retteý Jer kodeksiniń 43, 44 jáne 48-baptaryna sáıkes júzege asyrylady. Aýyldyń bas jospary áli bekitilmegendikten, jerlerdiń nysanaly maqsatyn ózgertý ýaqytsha shektelgen.

Ákimdiktiń habarlaýynsha, osy jyldyń sońyna deıin jerge ornalastyrý qujattamasyn ázirleý jáne jańartý jumystary aıaqtalyp, bas josparǵa ózgerister engiziledi. Jospar bekitilgennen keıin azamattar kótergen ózekti máseleler kezeń-kezeńimen sheshile bastaıdy.

Osyǵan deıin Almaty oblysy Kólsaı kólderiniń eteginde ornalasqan Saty aýylynda jerge qatysty daý shyqqan bolatyn. Jergilikti turǵyndar aýyldyń burynǵy basshylyǵyn jer telimderin zańsyz satqan dep aıyptap otyr. 

Eske salaıyq, 2023 jyly Almaty oblysynyń Saty aýyly halyqaralyq deńgeıde eń úzdik týrıstik aýyl retinde tanylyp, bedeldi «Best Tourism Villages by UNWTO» syılyǵymen marapattaldy. 

Sondaı-aq óńirde týrısterdiń qaýipsizdigin kúsheıtý maqsatynda qandaı jobalar qolǵa alynǵany týraly jazǵan edik.