Satbayev University jataqhana problemasy nege sheshilmeı jatqanyn túsindirdi
ALMATY. QazAqparat - Satbayev University basshylyǵy stýdentterdiń nelikten oqý zalynda turyp kelgenin aıtty, dep habarlaıdy QazAqparat tilshisi.
Munyń aldynda QR Sybaılas jemqorlyqqa qarsy is-qımyl jáne memlekettik qyzmet isteri Agenttigi atalǵan oqý ornynda júrgizilgen reıd nátıjesin jarııalaǵan bolatyn. Belgili bolǵandaı, birqatar jataqhanalar kúrdeli jóndeýdi talap etedi.
«№1, 2, 3, 4 jataqhanalarda jóndeý jumystary durys júrgizilmegen. Aqsha únemdeý úshin keı jataqhanalarda komendant qyzmetin stýdentterdiń ózi tegin atqarǵan», - dedi agenttiktiń baspasóz qyzmetinen.
Bul keltirilgen argýmentterge Satbayev University resmı túrde jaýap joldady.
Oqý ornynyń habarlaýynsha, bıyl 2,5 myń stýdent bakalavrıatqa oqýǵa túsken.
«Bıyl oqýǵa túsken stýdentterdiń sany byltyrǵyǵa qaraǵanda 2 ese kóp. Al jataqhanalarda barlyǵy 2000 oryn bar. Sondyqtan, oqý orny shuǵyl túrde stýdentterdi ornalastyrý jolyn izdedi. Osy maqsatta oqý zalyna birneshe tósek qoıyp, stýdentterge jaǵdaı jasaýǵa týra keldi», - dedi oqý ornynyń bapasóz qyzmetinen.
Oqý ornynyń basshylyǵy jataqhana máselesin 2020 jylǵa qaraı túbegeıli sheshpek.
«Atap aıtqanda, Almatyda Ladygın, 34 mekenjaıynda jańa jataqhana salýǵa ruqsat aldyq. Bul ruqsat qaǵazyn alý úshin 2 jyldaı ýaqyt ketti. Sonymen qatar, ýnıversıtetke tıesili №9 jataqhana TJD tarapynan «seısmıkalyq turǵydan qaýipti» degen jeleýmen jabyq tur. Biraz ýaqyttan soń ol jataqhana súrilip, ornyna jańa ǵımarat boı kóteredi»- dedi baspasóz qyzmetinen.
