Sátpaevtyń jaraqaty asqynyp ketpeýi úshin úzilis qajet — Seıil Qojataı
ASTANA. KAZINFORM — «Qaırat» fýtbol klýby ÝEFA týrnırindegi syrt alańdaǵy oıynda «Kopengagennen» 3:2 esebimen jeńildi. Osyǵan baılanysty jýrnalıst Seıil Qojataı Jibek Joly telearnasynyń Búgin LIVE baǵdarlamasynda matchqa qatysty pikir bildirdi.
Seıil Qojataıdyń aıtýynsha, bul kezdesýde maýsymdyq úzilistiń áseri aıqyn baıqalǵan.
— Qazaqstan chempıonaty qazan aıynda aıaqtaldy, arada bir aı ótti. Fýtbolshylardyń oıyn tájirıbesi azaıyp, babynda bolmaýy — qalypty jaǵdaı. Tek jattyǵýmen alańǵa shyǵý ońaı emes. Jazdaǵy Chempıondar lıgasynyń irikteýindegi matchtar jáne «Real», «Sportıng», «Interge» qarsy matchtardy mysalǵa alýǵa bolady. Degenmen syrt alańda 3:2 esebimen oınap, gol soǵyp, teń nátıjege sál ǵana jetpeı qalý — bizdiń jigitter úshin jaqsy kórsetkish, — dedi ol.
Jýrnalıst Dastan Sátpaevtyń kelesi oıynǵa qatyspaýyna da túsinik berdi. Fýtbolshy úsh ret alǵan sary qaǵazǵa baılanysty bir matchty jiberedi.
— Dastan Sátpaev bıylǵy maýsymdy óte aýyr ótkizdi. Jasy nebári 17-de ekenine qaramastan matchtardyń kóbin tolyq oınap shyqty, gol soqty. Jaraqattary da bar. Ony bapkerler shtaby men klýbtyń medıtsınalyq qyzmeti jaqsy túsinedi. Oıynshynyń jaraqaty asqynyp ketpeýi úshin keıde úzilis qajet. Alda «Olımpıakos» jáne «Brıýgge» komandalaryna qarsy oıyndar bar. Eń mańyzdysy — «Arsenalmen» ótetin match. Sol kezdesýge tolyqtaı daıyn bolsyn degen sheshim bolýy múmkin. Bas bapker de bul týraly ashyq aıtty. Sondyqtan Sátpaevtyń densaýlyǵy qazir bárinen mańyzdy, táýekelge barýdyń qajeti joq, — dedi Seıil Qojataı.
Aıta keteıik, chempıondar lıgasy: «Qaırat» syrt alańda «Kopengagenge» ese jiberdi.