Sátbaevtaǵy jaǵdaı. «Qazaqmys» jumysshylarynyń jalaqy máselesi sheshildi me
ASTANA. KAZINFORM — 2024 jylǵy 18 jeltoqsanda «Qazaqmys korporatsııasy» JShS basqarma tóraǵasy Nurahmet Nýrıev Jezqazǵan óndiristik alańyndaǵy kenishterdiń brıgadırlerimen kezdesti.
Jıynǵa sonymen qatar Jezqazǵan qalasynyń ákimi Qaırat Shaıjanov, Sátbaev qalasynyń ákimi Murat Bóribaev qatysty.
— Kezdesýde jumyskerlerdiń talaby talqylandy. Jıyn qorytyndysynda «13-shi jalaqyǵa» 30 paıyz mólsherinde ústemeaqy qosý týraly talapty qanaǵattandyrý týraly sheshim qabyldandy, — delingen habarlamada.
Jalaqyǵa keletin bolsaq, jumys berýshi 2025 jyldyń 1 qańtarynan bastap jalaqyny kóterýdiń eki nusqasyn usyndy:
1-nusqa: jalaqy mólsherin qosymsha 8,5%-ǵa ulǵaıtý, óndiristik jospardy oryndaǵany úshin qosymsha 50 AEK mólsherinde tórt toqsandyq syılyqaqy (2025 jyly — toqsan saıyn 196 myń teńge);
2-nusqa: Jalaqyny 15,6%-ǵa ındeksteý.
Kelissóz barysynda N.Nýrıev jalaqynyń kúrt ári negizsiz ulǵaıýy túptiń túbinde kompanııanyń birqatar kenishteriniń básekege qabilettiligin joıyp, konservatsııalanýyna ákeletinine, saldarynan jumys oryndarynyń jabylýyna ákelip soqtyratynyn atap ótti.
Sondaı-aq, usynystardy túsindirý úshin jumys oryndarynda, onyń ishinde shahtalarda jumysshylarmen tikeleı kezdesý uıymdastyryldy.
— 2024 jyl 19 jeltoqsan saǵat 09:00–degi jaǵdaı boıynsha, kelissóz jalǵasýda. Kompanııa barlyq jumyskerlerdi ystyq tamaqpen qamtamasyz etýde. «Qazaqmys korporatsııasy» JShS qalyptasqan jaǵdaıdy tezirek sheshý úshin oń qadamdardy júzege asyrýdy jalǵastyrýda, — delingen habarlamada.
Buǵan deıin Eńbekmıni Qazaqmys jumyskerlerin eńbek daýyn quqyqtyq alańda retteýge shaqyrǵany habarlandy.