Sátbaevtaǵy qara qar. Ekologııa departamenti sebebin anyqtady
ASTANA. KAZINFORM — 2025 jyldyń 8 qańtarynan bastap áleýmettik jelilerde Sátbaev qalasynyń turǵyndarynyń qara qar týraly habarlamalary taraı bastady, dep habarlaıdy Ekologııalyq retteý jáne baqylaý komıteti.
Ekologııa departamentiniń qyzmetkerleri bul qubylystyń sebepterin anyqtad.
— Onyń kózi — «Kazakhmys Distribution» JShS jylý elektr stantsııasy qazandyqtarynan tazartý qondyrǵylary arqyly atmosferaǵa tolyq tazartylmaı enetin lastaýshy zattardyń shyǵaryndylary, — delingen vedomstvo habarlamasynda.
2024 jyly Ulytaý oblysy boıynsha ekologııa departamenti osyǵan uqsas fakti boıynsha «Kazakhmys Distribution» jaýapkershiligi shekteýli seriktestigine tekserý júrgizgen bolatyn. Tekserý qorytyndysy boıynsha anyqtalǵan buzýshylyqtar úshin 42,9 mln teńge aıyppul salynyp, buzýshylyqtardy joıý týraly uıǵarym shyǵaryldy.
2025 jyldyń 21 qańtarynan bastap Ekologııa departamenti «Kazakhmys Distribution» JShS qyzmetine jospardan tys tekserý júrgizýde.
— Qazir mamandar JEO-nyń shyǵaryndy kózderinen ári qaraı taldaý úshin synama alyp jatyr. Anyqtalǵan buzýshylyqtar jáne qabyldanǵan sharalar týraly aqparat tekserý aıaqtalǵannan keıin beriledi, — delingen habarlamada.
Eske salsaq, qańtardyń basynda Sátbaev qalasy tútin men kúıeniń astynda qalǵany anyqtaldy.