Sátbaevta jańartylǵan «Aqbota» balabaqshasy ashyldy
ASTANA. KAZINFORM - «Qazaqmys» korporatsııasy Sátbaev qalasyndaǵy «Aqbota» bóbekjaıyna kúrdeli jóndeý jumystaryn aıaqtady.
Bul joba Ulytaý oblysynyń ákimdigimen memorandým aıasynda júzege asyrylyp jatqan, kompanııanyń korporatıvtik áleýmettik jaýapkershiliginiń aýqymdy baǵdarlamalarynyń bir bóligi. Jobanyń jalpy quny - 967 mıllıon teńge.
Jergilikti atqarýshy organdardyń negizgi suraýlarynyń biri mektepke deıingi bilim berý mekemelerine kezek máselesin sheshý bolǵan. Bóbekjaıdy iske qosý balabaqsha kezegin qysqartýǵa jáne 320 balany tárbıeleý úshin qolaıly jaǵdaı jasaýǵa múmkindik berdi.
Kúrdeli jóndeý jumystary aıasynda balabaqsha tolyǵymen jańartylyp, zaman talabyna saı jabdyqtalǵan. Shatyry, qasbeti men ınjenerlik kommýnıkatsııalar jóndelip, oıyn bólmelerine jyly edender salyndy. Balalardyń qaýipsizdigin qamtamasyz etý úshin beınebaqylaý kameralary men órt dabyly ornatylǵan.
Balalardyń jan-jaqty damýyna erekshe kóńil bólinedi. Montessorı bólmesi, densaýlyqty nyǵaıtýǵa arnalǵan tuz bólmesi, deneshynyqtyrý bólmesi, mýzyka bólmesi jáne shyǵarmashylyq aımaqtar bar. Balabaqsha aýmaǵyndaǵy oıyn alańdary jańartylyp, aǵashtar otyrǵyzylyp, jańa asfalt tóseldi.
«Qazaqmys korporatsııasy» JShS Basqarma tóraǵasy Nurahmet Nýrıev bul joba kompanııanyń jańa áleýmettik bastamalaryn ashatynyn atap ótti. Jaqyn ýaqytta óńirde taǵy segiz mańyzdy jobany aıaqtaý josparlanýda.
Sátbaev qalasynyń ákimi Murat Bóribaev balalardy tárbıeleý úshin jaǵdaı jasaý, bolashaq urpaqty laıyqty tárbıeleýdiń kepili ekenin atap ótti.
Osyndaı kólemdi jobalar «Qazaqmys» korporatsııasynyń áleýmettik jaýapkershilgi men óńirlerdiń bolashaǵy men damýyna qosyp jatqan erekshe úlesiniń dáleli.