Sátbaevta órtengen páterden 4 jasar búldirshinniń múrdesi tabyldy
ASTANA. QazAqparat - Qaraǵandy oblysynyń Sátbaev qalasynda órtengen páterden 4 jasar búldirshinniń múrdesi tabyldy. Bul týraly QR ІІM Tótenshe jaǵdaılar komıtetiniń resmı ókili Nursultan Nurahmetov aıtty, dep habarlaıdy QazAqparat tilshisi.
«29 qańtar kúni saǵat 05.22-de Qaraǵandy oblystyq TJD «101» pýltine Sátbaev qalasynyń Baıqońyrov kóshesi boıyndaǵy eki qabatty turǵyn úıdiń órtenip jatqandyǵy týraly habar tústi. Órt birinshi qabattaǵy páterden shyǵyp, qyzyl jalyn 8 sharshy metr aýmaqqa taraǵan. Saǵat 05.52-de órttiń aldy alynyp, 06.12-te tolyq óshirildi. Órt ornynan 2015 jyly dúnıege kelgen qyzdyń kúıgen múrdesi tabyldy», - dedi resmı ókil.
Onyń dereginshe, órt saldarynan kúıik shalyp, ıis tıip ýlanǵan 30 jastaǵy áıel aýrýhanaǵa jatqyzyldy. Ottyń tutaný sebebi anyqtalyp jatyr. Tilsiz jaýdy sóndirýge Qaraǵandy oblystyq TJD jeke quramynyń 22 mamany men 6 tehnıkasy jumyldyryldy.
