Sátbaevta mas kúıinde jedel járdem kóligin aıdap ketken er adam ustaldy
Oqıǵa 18 qyrkúıekte bolǵan. Tańǵy saǵat 5.30 shamasynda Ulytaý oblysy Sátbaev qalasynyń polıtsııa bólimine belgisiz bireý medıtsınalyq mekemeniń kólik turaǵynda turǵan jedel járdem kóligin aıdap ketkeni týraly habarlama kelip tústi.
Belgili bolǵandaı, dárigerler kezekti patsıentin aýrýhanaǵa jetkizgen. Júrgizýshi feldsherlerge naýqasty qabyldaý bólimine alyp kirýge kómektesip jatqanda, belgisiz bireý júrgizýshiniń joqtyǵyn paıdalanyp, qyzmettik kóliktiń kabınasyna kirip, ony otaldyryp, aıdap ketken.
«Sátbaev qalasynyń PB patrýldik polıtsııa vzvodynyń jasaǵy kúdiktini izin sýytpaı ustady. Bul áreketke 32 jastaǵy er adam barǵany anyqtalǵan. Ol aıdap ketken kólikti basqara almaı, jolda aýdarylyp qalǵan. Onyń ústine qaskúnem mas kúıde bolǵany anyqtaldy, ony medıtsınalyq kýálandyrý rastady», - dep habarlady Ulytaý oblystyq PD baspasóz qyzmeti.
Kúdiktige qatysty QR ÁQBtK-niń 608-baby «Mas kúıindegi júrgizýshiniń kólik quralyn basqarýy» boıynsha ákimshilik materıal rásimdeldi, budan basqa QR QK-niń 200-baby «Avtomobıldi nemese ózge de kólikti urlaý maqsatynsyz zańsyz ıelený» boıynsha sotqa deıingi tergeý bastaldy.