Sátbaevta qalalyq prokýratýranyń jańa ǵımaraty ashyldy

SÁTBAEV. QazAqparat – Qaraǵandy oblysynyń Sátbaev qalasynda prokýratýranyń jańa ǵımaratyn ashý saltanaty ótti. Buǵan deıin qyzmetkerler 50 jyl buryn salynǵan eski ǵımaratta jumys istep keldi, dep habarlaıdy QazAqparat tilshisi.

Ǵımarattyń ashylý rásimine Qaraǵandy oblysynyń ákimi Jeńis Qasymbek, Qaraǵandy oblystyq sotynyń tóraǵasy Nurserik Sháripov, QR Ulttyq qaýipsizdik komıtetiniń Qaraǵandy oblysy boıynsha departamentiniń basshysy Kendebaı Adambekov jáne Qaraǵandy oblysynyń prokýrory Qusaıyn Igembaev qatysty.

Úsh qabatty jańa ǵımarat búgingi kúnniń talaptaryna saı keletin qaýipsizdik, sanıtarlyq jáne tehnologııalyq normalardy eskere otyryp salynǵan.

«Bul ǵımaratta azamattar ózderine qajetti barlyq málimetterdi alýyna bolady. Kelýshilerge múmkindiginshe qolaıly jaǵdaılar jasalǵan, onyń ishinde zamanaýı kútý zaly jabdyqtalyp, múgedektigi bar adamdarǵa qyzmetterdiń qoljetimdiligi qamtamasyz etilgen», - dep málimdedi Qaraǵandy oblysy prokýratýrasynyń baspasóz qyzmeti.

Oblys prokýrory qyzmetkerlerdi jańa qonyspen quttyqtap, aldaǵy kezeńdegi mindetterdi belgiledi.