Sátbaev ýnıversıtetiniń ǵalymdary ámbebap shaǵyn sý elektr stantsııasyn jasady

QYZYLORDA. KAZINFORM — Qyzylorda oblysynda Sátbaev ýnıversıtetiniń ǵalymdary qurastyrǵan shaǵyn sý elektr stantsııasy synaqtan ótti. Bul týraly Ǵylym jáne joǵary bilim mınıstrligi málim etti.

Qondyrǵy jerasty uńǵymalyq shaımalaý ádisimen ýran óndiretin kásiporynǵa ornatyldy. Stantsııa tot baspaıtyn bolattan jasalǵan jáne tolyqtaı germetıkalyq, korrozııaǵa tózimdi qaptamamen qorǵalǵan. Ol eritindi júretin qubyrǵa tikeleı ornatylady da, aǵyn qozǵalysynan elektr energııasyn óndiredi, tipti agressıvti ortada da jumys isteı alady.

Bir stantsııa aǵyn jyldamdyǵy men qubyrdaǵy suıyq kólemine qaraı saǵatyna 7 kVt-qa deıin elektr óndire alady. Ony ónerkásip oryndarynda ǵana emes, sharýa qojalyqtarynda, týrıstik bazalarda, sondaı-aq ózen nemese óndiristik aǵyny bar shalǵaı aýyldarda da qoldanýǵa bolady.

– Biz energııany kútpegen jerden – ónerkásiptik qubyrlardan óndirýdiń jolyn taptyq. Bul qoldanbaly ǵylymnyń basty mindeti: shyǵyndy resýrsqa aınaldyrý, – deıdi jobaǵa qatysýshy, qaýymdastyrylǵan professor Rýslan Ótebaev.

Elektr óndirýden bólek qondyrǵy qubyrdaǵy zııandy dirildi azaıtyp, jabdyqtyń qyzmet merzimin uzartady jáne qaýipsizdigin arttyrady. Stantsııany ornatý úshin bólek ǵımarat nemese kúrdeli ınfraqurylym qajet emes, bul ony elektr jelisine qosylý múmkindigi shekteýli aımaqtar úshin asa tıimdi etedi.

Ámbebap shaǵyn sý elektr stantsııasy – ǵalymdardyń ǵylym men óndiristi ushtastyra otyryp, naqty ekonomıkalyq paıda ákeletin ınjenerlik sheshimder jasaı alatynyn dáleldeıtin mysal.

Buǵan deıin habarlanǵandaı, búgin Qazaqstan Respýblıkasy Prezıdentiniń Jarlyǵymen akademık E. A. Bóketov atyndaǵy Qaraǵandy ýnıversıtetine ulttyq joǵary oqý orny mártebesi berildi.