Sátbaev turǵyny saýda ortalyǵyn «jaryp jibermek» boldy
QARAǴANDY. QazAqparat - Qaraǵandy oblysy Sátbaev qalasynda belgisiz er adam «101» nómirine qońyraý shalyp, «Prestıj» saýda ortalyǵyna jarylǵysh zat qoıylǵandyǵy týraly habarlaǵan. Shuǵyl qabyldanǵan sheshimmen tártip saqshylary adamdardy saýda úıinen ǵana emes, jaqyn mańda ornalasqan turǵyn úılerden de evakýatsııalaǵan, dep habarlaıdy QazAqparat tilshisi.
«Saýda ortalyǵynan - 40, kórshi turǵan úılerden 30 adam qaýipsiz jerge shyǵaryldy. Qaraǵandy oblysy Іshki ister departamentiniń oqý-jattyǵý jasaǵynyń qyzmetkerleri ǵımaratty, onyń árbir býtıgin, qosalqy bólmelerin qarap shyqty. Kúdikti eshbir zat tabylmady. 34 jastaǵy jergilikti turǵyn shuǵyl túrde anyqtalyp, ustaldy», - dep málim etti ІІD baspasóz qyzmetiniń basshysy Baqtııar Qudııarov.
Er adam qylmysyn moıyndady. Odan qońyraý jasalǵan uıaly telefon alyndy.
Sotqa deıingi tergep-tekserý amaldary QR Qylmystyq kodeksiniń 273-baby («Lańkestik aktisi týraly kórineý jalǵan habar berý») boıynsha júrgizilýde. Kúdikti ýaqytsha oqshaýlaǵyshqa qamaldy.
