Sátbaev turǵyny otadan keıin ishinde qalyp qoıǵan dákemen bir jyl júrgen
QARAǴANDY. QazAqparat - Elordada otadan shyqqan 49 jastaǵy azamat ish qurylysynan dáke shyqqanyn aıtady. Bir jyl boıy qyzýy kóterilip, qınalǵan Qaraǵandy oblysy Sátbaev turǵynynyń barmaǵan aýrýhanasy qalmaǵan, dep habarlaıdy QazAqparat tilshisi.
Talǵat Elýbaevtyń aıtýynsha, osydan bir jyl buryn Jezqazǵan aýrýhanasynyń dárigerleri búıreginde tas bar dep ota jasaǵan.
Biraq búırekke ota jasaǵannan keıin onyń jaǵdaıy ýshyǵyp ketedi.
Dárigerler oǵan ınfektsııa túsken dep taǵy operatsııa jasaǵan. Alaıda aýrý odan saıyn asqynyp ketti deıdi.
Jany qınalǵan azamat elordanyń birinshi aýrýhanasyna túsedi. Sózinshe, keshe ota jasaý kezinde dárigerler onyń ishinen dáke alyp shyqqan.
«Іshinde shirip ketken deıdi. Sony alyp shyqty», - deıdi naýqas Talǵat Elýbaev.
Onyń týysy Gúlmıra Elýbaeva aǵasyn aýyr halge túsirgen Jezqazǵan dárigerlerin jazalaýdy suraıdy.
Aıtýynsha, aq halattylardyń kesirinen Talǵat Elýbaevtyń densaýlyǵyna aıtarlyqtaı zaqym kelgen.
«Bizdiń Jezqazǵannyń bylyǵy. Dárigerlerdiń salǵyrttyǵy osymen bir emes, ekinshi ret qaıtalanyp otyr. Olar búırektiń ishin ashqan kezde búırek saý bolyp shyqty. Ony qaıta japty. Sol japqannan ınfektsııa túsirdi. Infektsııanyń sońy osylaı ýshyǵyp tur. Astanaǵa eń sońǵy úmitimimizben kelip turmyz, keshe osy qalalyq aýrýhanada operatsııa jasaldy aǵama, ishinen dáke jibimen birge shyqty. Sol irińdep ketken. Qansha ret ÝDZ-ǵa tústi, nege bilmedi?»,- deıdi naýqastyń týysy Gúlmıra Elýbaeva.
Al Jezqazǵan qalalyq ortalyq aýrýhanasynan suhbat alý múmkin bolmady.
Al Qaraǵandy oblysynyń densaýlyq saqtaý basqarmasy osy jaǵdaıǵa qatysty tekserý bastalǵanyn jetkizdi.
