Sátbaev metsenattary múgedek bala tárbıelep otyrǵan otbasyna páter kiltin tabys etti

SÁTBAEV. QazAqparat – Sátbaev qalasynyń jomart jandary múmkindigi shekteýli bala asyrap otyrǵan kópbalaly anaǵa páter kiltin syılady. Bul qaladaǵy «Meıirim shýaǵy» metsenattar klýbynyń kómegimen baspana alǵan úshinshi otbasy, dep habarlaıdy QazAqparat tilshisi.

Sátbaev qalasynda erekshe bala tárbıelep otyrǵan taǵy bir otbasy qonys toıyn atap ótti. Kópten kútken baspanany kópbalaly ana Aınur Júnisova «Meıirim shýaǵy» metsenattar klýbynyń bastamasynyń arqasynda aldy. Bul páter kiltin alyp otyrǵan alǵashqy otbasy emes. Osyǵan deıin qaıyrymdylyq aktsııasy aıasynda taǵy eki otbasy baspanaly boldy.

Klýb músheleri bastamasynyń negizgi maqsaty – múmkindigi shekteýli balalardy tárbıelep otyrǵan otbasylarǵa óz kómegin usyný.

«Osy maqsatymyzdyń iske asyp jatqany janymyzǵa qýanysh syılaıdy. Erekshe balalardy tárbıelep otyrǵan Aınur Júnisova bizge ótinish bildirip, kómek suraı kelgen bolatyn. Kópbalaly, batyr ananyń ótinishin jerge tastamaı óz tarapymyzdan búgingi tańda turǵyn úı qurysyn salýmen aınalysatyn Marǵulan Moldashov jáne Abaı Baıdildaev esimdi kásipkerlerge jetkizdik. Ótinish jerde qalmady, olar jomarttyǵyn kórsetti. Nátıjesinde Aınur esimdi kópbalaly anamyz Shatalıýk kóshesi 22 mekenjaıynda ornalasqan, kúrdeli jóndeýden ótken turǵyn úıden 3 bólmeli páterge qol jetkizdi. Bul úshin árıne, qoldaý bildirgen barsha azamatqa alǵysymyzdy bildiremiz. Biz árqashan bir birimizge demeý bolýymyz kerek. Sonda ǵana birligimizdi kórsete alamyz. Qonys toı qutty bolsyn! Sóz sońynda barsha qalamyzdyń turǵyndaryn sabyrlyqqa shaqyrǵym keledi»,- dedi «Meıirim shýaǵy» metsenattar klýbynyń tóraıymy Merýert Baqbergenova.

Sondaı-aq, klýb tóraıymy Sátbaevtaǵy sońǵy jaǵymsyz oqıǵalarǵa baılanysty jergilikti turǵyndardyń kóńil-kúıi túsip, alańdaýshylyq paıda bolǵanyn aıtty. Alaıda, kóp balaly jáne múgedek balalardy tárbıelep otyrǵan analar úshin turǵyn úı satyp alý sekildi osyndaı ıgi ister jaqsylyqqa degen senimdi nyǵaıtady deıdi ol.