Sátbaev Qazaqstanda ǵylym men ındýstrııalyq damýdyń kóshbasshysyna aınaldy - Memlekettik hatshy
Sharaǵa Pavlodar oblysynyń ákimi Ábilqaıyr Sqaqov jáne elorda ákimi Altaı Kólginov qatysty.
«Qazaqtyń qasıetti topyraǵy el bastaǵan kósem, sóz bastaǵan sheshen, dúnıeniń bilimin ıgergen ǵalymǵa eshqashan kende bolǵan emes. Altyn qursaqty analar ár dáýirde Alashqa adal qyzmet etken arda azamattardy dúnıege ákelgen. Al ótken ǵasyrda qazaq aspanynda bir top ǵalymnyń shoǵyry jarqyraı kórindi. Solardyń arasynda Qanysh Imantaıuly Sátpaevtyń tulǵasy shyńǵa bitken shynardaı bolatyn. Baıanaýyldan qanat qaqqan, qazaq kóginde qalyqtaı samǵaǵan, Alash ǵylymynyń damýyn alty qyrdan asyrǵan, álemdik ilim-bilimniń eń bıigine kóterilgen Qanysh Sátbaev asa kórnekti geolog-ǵalym ǵana emes, óz zamanynyń jaryq juldyzy, oıshyl ǵulamasy, memleket jáne qoǵam qaıratkeri edi. Ol óziniń sheber uıymdastyrýshylyq qabileti arqasynda Qazaqstanda ǵylym men ındýstrııalyq damýdyń kóshbasshysyna, kemeńger tulǵasyna aınaldy», - dedi Memlekettik hatshy eskertkishtiń ashylý saltanatynda.
Qanysh Sátbaev Alash qozǵalysynyń kósemderimen murattas bolǵan. Ultqa qyzmet etýde aǵa býyndy úlgi etkenin, el isinde barlyq salaǵa belsene aralasqanyn, Qazaqstan ǵylymynyń órkendeýine eleýli úles qosqanyn atap ótti.
«Óz eliniń qara tasyn maqtan ete almaǵan, ózge jerdiń altynyn da maqtap jarytpaq emes» degen eken Qanysh Sátbaev. Osy oıǵa salsaq, halqy Qanyshyn qal-qadirinshe ardaqtap, esimin ulyqtap keledi. Ǵulama ǵalymnyń atyna buǵan deıin qala, kóshe ataýlarynyń berilýi – sonyń aıǵaǵy. Keshegi Qazaq taý-ken-metallýrgııa ınstıtýtynyń búginde Q.I.Sátbaev atyndaǵy Qazaq ulttyq tehnıkalyq zertteý ýnıversıteti atalýy da zor mártebe. Bul – ultynyń uly perzentine kórsetken qurmetiniń bir parasy ǵana», – dedi Qyrymbek Kósherbaev.
Elordada Qanysh Sátbaevqa eskertkish ornatýdy Pavlodar oblysynyń ákimdigi bastama etip kótergen edi. Respýblıka boıynsha sanaǵanda, búgin Qanysh Sátbaevqa 15-shi eskertkish ornatyldy.
Eskertkish Qanysh Sátbaev jáne Qajymuqan Muńaıtpasov kósheleriniń qıylysynda, «Qazaqstan» sport kesheni alańynda ornalasqan. Onyń bıiktigi – 5,25 metr, qoladan jasalǵan, salmaǵy – 4,9 tonna. Avtory – belgili músinshi Asqar Nartov.