Sátbaev kanalynan Astanaǵa deıin sý qubyry salynady — Úkimet
ASTANA. KAZINFORM — Premer-mınıstrdiń birinshi orynbasary Nurlybek Nálibaev memlekettik organdardyń, elorda ákimdiginiń jáne «Elorda Aqua» ShJQ-daǵy MKK ókilderiniń qatysýymen Q.I. Sátbaev atyndaǵy kanaldan Astana qalasyna deıin № 4 sorǵy-súzý stansasynyń qurylysymen sý qubyryn salý jobasyn júzege asyrý máseleleri boıynsha keńes ótkizdi. Bul týraly Úkimettiń baspasóz qzmeti málim etti.
Jıyn barysynda jumystyń qazirgi jaı-kúıi qaraldy. Jobany júzege asyrýdy jedeldetý jáne belgilengen merzimde qurylys-montajdaý jumystaryn bastaý boıynsha sharalar talqylandy.
— Joba elordanyń uzaqmerzimdi sý qaýipsizdigin qamtamasyz etý úshin strategııalyq mańyzǵa ıe. Ol 203 shaqyrym sý qubyryn, úsh sorǵy stansasyn jáne táýligine 210 myń m³ sý óndiretin № 4 sorǵy-súzý stansasyn salýdy kózdeıdi. Qurylysty aıaqtaý 2028 jylǵa josparlanǵan, — delingen habarlamada.
Jobany júzege asyrý halyq sanynyń ósýin jáne sý tutynýdyń artýyn eskere otyryp, Astanany turaqty sýmen qamtamasyz etýge, qalany sýmen jabdyqtaýdyń ekinshi kózin qalyptastyrýǵa múmkindik beretini atap ótildi.
Keńes qorytyndysy boıynsha Nurlybek Nálibaev múddeli memlekettik organdarǵa jobany ýaqtyly júzege asyrý úshin qajetti sheshimderdiń qabyldanýyn qamtamasyz etýdi jáne barlyq josparlanǵan rásimderdi barynsha qysqa merzimde aıaqtaýdy tapsyrdy.
Aıta keteıik, buǵan deıin Nálibaev Qostanaı oblysyndaǵy iri jobalardyń júzege asyrylý barysymen tanysqan bolatyn.
