Sátbaev qalasyndaǵy jaǵdaı turaqty - ákimdik
SÁTBAEV. QazAqparat - Sátbaev qalasyndaǵy jaǵdaı turaqtandy. Oqıǵa ornyna Qaraǵandy oblysynyń ákimi Jeńis Qasymbek attandy, dep habarlaıdy QazAqparat oblys ákimdiginiń baspasóz qyzmetine silteme jasap.
Baspasóz qyzmetiniń málimdeýinshe, 23 shilde kúni saǵat 21.00-de Sátbaev qalasynyń polıtsııasyna Jezqazǵan qalasynyń turǵyny habarlasyp, óziniń 5 jasar qyzynyń joǵalǵany týraly habarlady. Sátbaev qalasynyń polıtsııa bóliminiń jeke quramy men eriktiler qatysqan izdestirý is-sharalarynyń nátıjesinde bala kópqabatty úıdiń birindegi páterden tabylǵan.
«Qazir qyz bala aýrýhanada tekserilýde. Kúdikti ustaldy.
Ustalǵan azamattyń úıiniń janynda kúdiktini olardyń qolyna berýdi talap etetin bir top adamdardyń jınalǵan. Tártipsizdikterdiń jolyn kesý úshin quqyq qorǵaý organdarynyń kúsh-jigeri jumyldyrylǵan.
Qazirgi ýaqytta qaladaǵy jaǵdaı turaqtandy, adamdar oqıǵa ornynan tarqasty», delingen habarlamada.
Qaraǵandy oblysynyń ákimi Jeńis Qasymbek Sátbaevqa jol tartty.
«Quqyq qorǵaý organdary osy jaǵdaı boıynsha ádil jáne adal tergeý júrgizý úshin barlyq kúsh-jiger jumsalatynyn jetkizdi. Halyqtan arandatýshylyqqa jol bermeýdi suraımyz», delingen habarlamada.
