Sátbaev qalasyndaǵy órt eki adamnyń ómirin qıyp ketti
QARAǴANDY. QazAqparat - Búgin Qaraǵandy oblysy Sátbaev qalasynda eki qabatty 8 páterli aǵashtan turǵyzylǵan úıde tórt páter janyp ketti, saldarynan áıel men er adam qaza tapty, dep habarlaıdy «QazAqparat» HAA tilshisi.
«Órttiń shyǵýy týraly habar túngi saǵat 2:35-te tústi. Eki mınýttan keıin órt sóndirýshiler oqıǵa ornyna jetti. Órtke №3 deńgeı berildi, sebebi aǵashtan salynǵan birden tórt páter janǵan», - dep habarlady Qaraǵandy oblystyq TJD resmı ókili Janna Dáýrenbekova.
Tilsiz jaýmen Sátbaev jáne Jezqazǵan qalalarynyń órt sóndirýshileri kúresken. Eki páterden 1945 jylǵy er adam men 1949 jylǵy áıeldiń múrdesi tabyldy. Tilsiz jaý 04:08-de aýyzdyqtalyp, tańǵy saǵat beste sóndirildi. Órttiń jalpy kólemi 80 sharshy metrdi quraǵan.
