Sátbaev qalasyndaǵy oqıǵaǵa baılanysty Jeńis Qasymbek óńir halqyna úndeý joldady
QARAǴANDY. QazAqparat - Sátbaev qalasynda bes jasar qyzdy urlaý isi el Prezıdenti Qasym-Jomart Toqaevtyń jeke baqylaýynda. Bul týraly Qaraǵandy oblysynyń ákimi Jeńis Qasymbek aımaq turǵyndaryna arnalǵan beıneúndeýde málim etti, dep habarlaıdy QazAqparat tilshisi.
Oblys ákimi kúdiktiniń ustalǵanyn, qazir barlyq qajetti tergeý sharalary júrgizilip jatqanyn aıtty. Qyz ata-anasymen birge úıinde.
Óńir basshysy balanyń densaýlyǵyn úzdik mamandar qadaǵalaıtynyna sendirdi.
«Ókinishke qaraı, Sátbaevta oqıǵa oryn alǵan túni kinásiz adamdarǵa zııan kelgen. Tártip buzǵandardy toqtatý úshin jeke quram oqıǵa ornyna jumyldyryldy. Men azamattarymyzdyń júreginde narazylyq toly ekenin túsinemin jáne kelisemin. Biraq biz quqyqtyq memlekette ómir súremiz, sondyqtan da emotsııamyzdy tyıyp, bolǵan jaǵdaıdy quqyqtyq alańda qaraýymyz kerek», - dedi Jeńis Qasymbek.
Ol sondaı-aq tergeý aıaqtalǵannan keıin kinálini qatań jaza kútip turǵanyn atap ótti.
Esterińizge sala keteıik, bıylǵy 23 shildede Sátbaev polıtsııasyna er adam bes jasar qyzynyń joǵalǵanyn aıtyp, aryzdanǵan bolatyn. Qyzdy izdeý jumystaryna jergilikti polıtsııa bóliminiń barlyq jeke quramy men júzden astam erikti qatysty.
Bala túnde kópqabatty úılerdiń birinen tabyldy. Bul shaharda úlken shý týǵyzdy.
Qazir qalada jaǵdaı turaqtandy. Sátbaev kúndelikti rejımde ómir súrip jatyr.
Búgin Іshki ister mınıstri Erlan Turǵymbaev Sátbaevtaǵy bes jasar qyz balanyń joǵalýyna qatysty oqıǵanyń mán-jaıyn aıtyp bergen bolatyn.
Sondaı-aq, Prezıdent Shornaq aýyly men Sátbaev qalasyndaǵy jaǵdaıǵa baılanysty keńes ótkizdi.
