Sátbaev qalasynda sheneýnik balasy arqyly para aldy degen kúdigine ilindi
NUR-SULTAN. QazAqparat –Para aldy degen kúdikpen Sátbaev qalasy ákimdiginiń «Turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimi» MM basshysyna qatysty sotqa deıingi tergeý bastaldy, dep habarlaıdy QazAqparat.
QR Sybaılas jemqorlyqqa qarsy is-qımyl agenttiginiń málimetinshe, kúdikti óziniń qylmystyq oıynan habarsyz uly arqyly «Hlebstroı» JShS Qaraǵandy fılıalynyń dırektorynan jalpy kórsetken kómegi jáne «Óńirlerdi damytý – 2020» memlekettik baǵdarlamasy aıasynda qalada jaryqtandyrý ornatý boıynsha oryndalǵan jumystar aktisine kedergisiz qol qoıyp, qalǵan 4 mln teńge somasyn JShS-ǵa aýdarǵany úshin 1 mln 200 myń teńge somasynda para alý kúdigine ilinip otyr.
«Sotqa deıingi tergeý jalǵasýda. Kúdiktige qatysty túpkilikti sheshimdi onyń kinásiniń deńgeıin anyqtaý arqyly sot qabyldaıtyn bolady», - dep atap ótedi agenttikten.
