Sátbaev qalasynda Rýhanı kelisim kúni qarsańynda Dostyq úıi ashyldy
ASTANA. QazAqparat - Qaraǵandy oblysynyń Sátbaev qalasynda Rýhanı kelisim kúni qarsańynda Dostyq úıi ashyldy, dep habarlaıdy Qaraǵandy oblysy ákimdiginiń baspasóz qyzmeti.
Endi bir shańyraq astynda aımaqtyń barlyq etnomádenı ortalyqtary jınalady. Kenshiler qalasynda orys, ýkraın, tatar jáne koreı ortalyqtary jumys isteıdi.
«Dostyq úıin ashý máselesi burynnan pisip jetildi», dep atap ótti Sátbaev qalasynyń ákimi Asqar Ydyrysov.
«Menińshe, barlyq etnomádenı ortalyqtar úshin bul úlken mańyzǵa ıe. Munda jumysqa qajetti barlyq jaǵdaı jasalǵan - akt zaly, ádistemelik kabınet, kitaphana, ana tilin oqyp-úıretýge, jas urpaqty ulttyq mádenıetke baýlýǵa arnalǵan oqý synyby bar.
Dostyq úıi etnosaralyq qarym-qatynasqa, qoǵamdyq uıymdar arasyndaǵy yntymaqtastyq pen ózara seriktestikti nyǵaıtý úshin ashyq alań bolady»,-dedi Sátbaev qalasynyń ákimi Asqar Ydyrysov.
Dostyq úıi «Qazaqstan halyqtarynyń rýhanı, qoǵamdyq jáne ultaralyq yntymaqtastyǵy ortalyǵy» KMM quzyrynda. Qalanyń etnomádenı birlestikterinen bólek, munda «Shyndyq» shyǵarmashyl zııalylar qoǵamdyq uıymy jáne ómirlik qıyndyqqa tap bolǵan áıelder men balalarǵa arnalǵan daǵdarys ortalyǵy jumys isteıtin bolady.
Dostyq úıiniń ashylýymen Sátbaev qalasynyń turǵyndaryn Qazaqstan halqy Assambleıasynyń oblystyq Sekretarıatynyń jetekshisi Erlan Qusaıyn quttyqtady. Qaraǵandy oblysy ákiminiń atynan ol jańa mekemege Álıhan Bókeıhannyń 15 tomdyq shyǵarmalar jınaǵyn syıǵa tartty.
