Sátbaev qalasynda MJÁ aıasynda gemodıalız ortalyǵy ashylady
QARǴANDY. QazAqparat - Sátbaevta búırek jetkiliksizdigi bar emdelýshiler úshin jańa dıalız ortalyǵy ashylýǵa daıyndalyp jatyr. Ol Ortalyq qalalyq aýrýhananyń aýmaǵynda (Sátbaev qalasy, Qusaıynov kóshesi, 9) ornalasady jáne 30 naýqasqa eseptelgen, dep habarlaıdy Qaraǵandy oblysy ákimdiginiń resmı saıty.
Dıalız - bul búırekter qannyń jınalyp qalǵan qaldyqtaryn tolyq shyǵarýdan bas tartqanda, ózine búırekerdiń mindetin alatyn emshara.
Emshara kezinde patsıenttiń qany arnaıy súzgi arqyly ótedi, tazartylady jáne patsıentke kóktamyr arqyly keri quıylady. Ádette, gemodıalızge aptasyna birneshe ret barý kerek. Árbir protsedýra 2,5 saǵattan 4,5 saǵatqa deıin sozylady. Qazirgi kúni gemodıalızdi qajet etetin Sátbaev turǵyndaryna Jezqazǵan jáne Qaraǵandy qalalaryna barýlaryna týra keledi. Jańa ortalyq paıda bolǵan soń, bul medıtsınalyq kómekti qalalyq aýrýhanada alatyn bolady.
«Jobanyń bastamashysy – «NefroCare» JShS. Jeke ınvestorǵa «nóldik» jaldaý mólsherlemesimen úı-jaı berildi. Dıalız kabınetin jóndeýge jáne jaılastyrýǵa 16 mıllıon teńge, qural - jabdyqtardy satyp alýǵa 90 mıllıon teńge jumsaldy. Investıtsııanyń jalpy somasy – 106 mıllıon teńge», - dep habarlady oblystyq Densaýlyq saqtaý basqarmasy basshysynyń orynbasary Ásel Tuıaqova.
Onyń derekterinshe, Qaraǵandy oblysynda 149 dıalız apparaty jumys isteıdi, 500-ge jýyq naýqas em alady. Sondaı - aq, 2020 jyly Topar, Osakarovka jáne Qarqaraly qalalarynda taǵy da 3 dıalız ortalyǵyn ashý josparlanýda.
